কাজিৰঙাৰ উত্তৰ সংমণ্ডলত চোৰাং চিকাৰীয়ে ব্যৱহাৰ কৰা সা-সামগ্ৰী উদ্ধাৰ

অলপতে চোৰাংচিকাৰীয়ে এটা গঁড় হত্যা কৰি খড়্গ লৈ যোৱা কাজিৰঙাৰ উত্তৰ সংমণ্ডলৰ পৰা বন বিভাগে চোৰাং চিকাৰীয়ে ব্যৱহাৰ কৰা ভালেমান সামগ্ৰী উদ্ধাৰ কৰিছে। বন বিভাগে চলোৱা এটা যুটীয়া অভিযানত এই সামগ্ৰীবোৰ ধৰা পৰে।

জানিব পৰামতে ১৭ ফেব্ৰুৱাৰিত বন বিভাগে চোৰাং চিকাৰীৰ সন্ধানত ঘূৰি ফুৰোতে এখন প্লাষ্টিকৰ নাও আৰু এটা পাম্পৰ সৈতে আন কিছুমান চোৰাং চিকাৰীয়ে ব্যৱহাৰ কৰিব পৰা সামগ্ৰী উদ্ধাৰ কৰে।

সূত্ৰটোৱে জনোৱা মতে কাজিৰঙাৰ উত্তৰ সংমণ্ডলৰ সংমণ্ডল বিষয়া প্ৰাঞ্জল বৰুৱা আৰু বিশ্বনাথ জিলাৰ আৰক্ষী অধীক্ষক আৰু আৰক্ষী উপ-অধীক্ষকৰ নেতৃত্বত এই অভিযান চলিছিল।

তেওঁলোকে যোৱা ১৬ ফেব্ৰুৱাৰিত গ্ৰেপ্তাৰ কৰা চোৰাং চিকাৰী নুৰ হক আৰু সুৰ হকৰ স্বীকাৰোক্তিৰ ভিত্তিত এই অভিযান চলাইছিল। বন বিষয়া বৰুৱাই জনোৱা মতে এই সকলো সামগ্ৰী মাটিৰ তলত পুতি থোৱা আছিল।

চোৰাং চিকাৰীকেইজনে স্বীকাৰ কৰামতে তেওঁলোকে এইবোৰ ব্ৰহ্মপুত্ৰ পাৰ হৈ কাজিৰঙাত প্ৰৱেশ কৰিবলৈ ব্যৱহাৰ কৰিছিল।