মাৰ্চৰ পৰা আৰম্ভ হ’ব আধাৰ কাৰ্ড বিতৰণৰ প্ৰক্ৰিয়া: মন্ত্ৰী চন্দ্ৰমোহন পাটোৱাৰী

আধাৰ কাৰ্ডক লৈ ৰাজ্যবাসীৰ মনত সন্দেহ-শংকা অব্যাহত থকাৰ মাজতে মাৰ্চৰ পৰা চৰকাৰে এই কাৰ্ড বিতৰণৰ যাৱতীয়া প্ৰক্ৰিয়া আৰম্ভ কৰিব বুলি অসম বিধানসভাৰ মজিয়াত ঘোষণা কৰিছে সংসদীয় পৰিক্ৰমা বিভাগৰ মন্ত্ৰী চন্দ্ৰমোহন পাটোৱাৰীয়ে।

সোমবাৰে বিধানসভাত কংগ্ৰেছ বিধায়ক দুৰ্গা ভূমিজৰ এটা প্ৰশ্নৰ উত্তৰ দি মন্ত্ৰী পাটোৱাৰীয়ে কয়: মাৰ্চৰ পৰাই ৰাজ্যবাসীয়ে আধাৰ কাৰ্ড লাভ কৰিবলৈ সক্ষম হ’ব। ইয়াৰ বাবে ১,২৪১টা আধাৰ কেন্দ্ৰ স্থাপনৰ ব্যৱস্থা কৰিছে ৰাজ্য চৰকাৰে।

উল্লেখ্য যে ইউনিক আইডেণ্টিফিকেচন অথ’ৰিটী অৱ ইণ্ডিয়া চমুকৈ য়ুআইডিএআই-এ ৰাজ্যত আধাৰ কাৰ্ড বিতৰণ নকৰাৰ সিদ্ধান্ত গ্ৰহণৰ পাছত ৰাজ্য চৰকাৰে নিজা উদ্যোগত এই সুবিধা আগবঢ়াব।

ইতিমধ্যে এই প্ৰক্ৰিয়া যাতে সুকলমে সম্পন্ন হয় তাৰ বাবে প্ৰতিখন জিলাৰ উপায়ুক্ত সকললৈ যাৱতীয় নিৰ্দেশ প্ৰেৰণ কৰা হৈছে বুলিও প্ৰকাশ কৰিছে উদ্যোগ আৰু বাণিজ্য বিভাগৰ মন্ত্ৰী গৰাকীয়ে।

উল্লেখ্য যে উচ্চতম ন্যায়ালয়ে আধাৰ কাৰ্ডৰ বাবে ৩১ মাৰ্চক শেষ সীমা বান্ধি দিয়াৰ পাছত চৰকাৰে এই ক্ষেত্ৰত কোনো ধৰণৰ উদ্যোগ গ্ৰহণ নকৰা বিষয়টোৱে ৰাজ্যবাসীৰ মাজত সৃষ্টি কৰিছিল তীব্ৰ প্ৰতিক্ৰিয়াৰ।অৱশ্যে সম্প্ৰতি মন্ত্ৰী চন্দ্ৰমোহন পাটোৱাৰীয়ে সদনত দিয়া বিবৃতিয়ে এই ক্ষেত্ৰত ৰাজ্যবাসীৰ সন্দেহ-শংকা দূৰ কৰিব বুলি আশা কৰা হৈছে।