গোলাঘাট বন্ধ সৰ্বাত্মক: ফেচবুকত সাম্প্ৰদায়িক মন্তব্য কৰা আজিজক গ্ৰেপ্তাৰৰ দাবীত উত্তাল গোলাঘাট

ফেচবুকৰ জৰিয়তে ধৰ্মীয় আবেগত আঘাত হনা তথা সাম্প্ৰদায়িক মন্তব্য কৰা আব্দুল আজিজক আৰক্ষীয়ে গ্ৰেপ্তাৰ কৰিব নোৱাৰৰ দাবীত মঙলবাৰে অনুসূচীত জাতি ছাত্ৰ সন্থাই আহ্বান কৰা ১২ ঘন্টীয়া গোলাঘাট জিলা বন্ধত জনজীৱন স্তব্ধ হৈ পৰা পৰিলক্ষিত হৈছে।

উল্লেখ্য যে আজিজে নিজৰ ফেচবুক একাউণ্টৰ পৰা হিন্দু সম্প্ৰদায়ে গো পূজা কৰা সন্দৰ্ভত এক সাম্প্ৰদায়িক মন্তব্য কৰিছিল। যাৰ পাচতে গোলাঘাট জিলাৰ সচেতন সমাজ তথা হিন্দু ধৰ্মৰ বিভিন্ন দল-সংগঠনে আজিজৰ গ্ৰেপ্তাৰৰ দাবীত মেৰাপানী আৰক্ষী থানাত গোচৰ ৰুজু কৰিছিল।

গোচৰ ৰুজু হোৱাৰ পিছতো আজিজক আৰক্ষীয়ে গ্ৰেপ্তাৰ কৰিব নোৱাৰাত আজি অনুসূচীত জাতি ছাত্ৰ সন্থাই আহ্বান কৰা ১২ ঘন্টীয়া গোলাঘাট জিলা বন্ধত জিলাখনত সৰ্বাত্মক প্ৰভাৱ পৰে। চৰকাৰী-বেচৰকাৰী কাৰ্যালয়-প্ৰতিষ্ঠান, বিদ্যালয়, দোকান-পোহাৰ, বেংক সেৱা আদিৰ কাম-কাজ বন্ধ হোৱা পৰিলক্ষিত হয়। উল্লেখ্য যে এই পৰ্যন্ত কোনো ধৰণৰ বিক্ষিপ্ত ঘটনাৰ খবৰ অহা নাই।

ক্ষুব্ধ প্ৰতিবাদকাৰীয়ে মেৰাপানী-গোলাঘাট আৰু নাগালেণ্ড সংযোগী পথ অৱৰোধ কৰাৰ লগতে ৰাজপথত টায়াৰ জ্বলাই সমগ্ৰ পৰিৱেশ উত্তাল কৰি তোলে বুলিও শেহতীয়াকৈ আমালৈ খবৰ আহিছে। পৰিস্থিতি যাতে অৱনতি নঘটে তাৰ প্ৰতি লক্ষ্য ৰাখি লগে লগে ঘটনাস্থলীত আৰক্ষী আৰু  চি আৰ পি এফ বাহিনী মোতায়েন কৰা হয়।

উল্লেখ্য যে, সাম্প্ৰদায়িক মন্তব্য কৰা আজিজক বিগত পাঁচ দিন ধৰি গোলাঘাট আৰক্ষীয়ে আটক কৰিব নোৱাৰাত পৰিস্থিতি অধিক ভয়ংকৰ হোৱাৰ সম্ভাৱণাই গা কৰি উঠিছে।