মেঘালয়ৰ মন্ত্ৰী, অতিৰিক্ত মুখ্য সচিবৰ বিৰুদ্ধে চি বি আইৰ গোচৰ ৰুজু

নিৰ্বাচনমুখী মেঘালয়ৰ ৰাজনীতিত জোকাৰনি দি আজি শাসনাধিষ্ঠিত কংগ্ৰেছ দলৰ এজন মন্ত্ৰী আৰু অতিৰিক্ত মুখ্য সচিবৰ বিৰুদ্ধে কেন্দ্ৰীয় তদন্তকাৰী সংস্থা (চি বি আই)ই দুৰ্নীতিৰ অভিযোগত গোচৰ ৰুজু কৰে। বৰ্তমানৰ গড়কাপ্তানী মন্ত্ৰী আমপাৰীন লিংডো আৰু অতিৰিক্ত মুখ্য সচিব পি এছ থাংখিউৰ বিৰুদ্ধে এই গোচৰ ৰুজু কৰা হৈছে। এটা চৰকাৰী সূত্ৰই এই কথা জানিবলৈ দিয়ে। দুয়োজনৰ বিৰুদ্ধে শিক্ষা বিভাগত ২০০৮-০৯ চনত নিম্ন প্ৰাথমিক বিদ্যালয়বোৰত সহকাৰী শিক্ষক নিযুক্তিৰ সময়ত ব্যাপক দুৰ্নীতি কৰাৰ অভিযোগ অনা হৈছে, যাৰ ভিতৰত নম্বৰ তালিকা সালসলনি কৰাটোও এটা। সূত্ৰটোৱে জনোৱা মতে চি বি আয়ে মেঘালয় উচ্চ ন্যায়ালয়ৰ নিৰ্দেশতে এই পদক্ষেপ লৈছে। ভাৰতীয় দণ্ডবিধিৰ অপৰাধমূলক ষড়যন্ত্ৰ, জালিয়াতি, বিশ্বাস ভংগ আদি ধাৰাৰ অধীনত লিংডোৰ বিৰুদ্ধে গোচৰ তৰা হৈছে। উল্লেখযোগ্য যে লিংডো কেলেংকাৰিটোৰ সময়ত শিক্ষা মন্ত্ৰী আছিল। আনহাতে থাংখিউ ১৯৪৮ বেচ্চৰ আই এ এছ বিষয়া হোৱাৰ লগতে সেই সময়ত শিক্ষা বিভাগৰ প্ৰধান সচিব আছিল। বৰ্তামান থাংখিউ অতিৰিক্ত মুখ্য সচিব পদত আছে।

সূত্ৰটোৱে জনোৱা মতে তদন্তকাৰী সংস্থাটোৱে তেওঁলোকৰ গোচৰত প্ৰাথমিক আৰু ৰাজহুৱা শিক্ষা সঞ্চালকালয় আৰু কিছু সংখ্যক অচিনাক্ত লোককো অভিযুক্ত কৰে।

উল্লেখযোগ্য যে মেঘালয় আৰক্ষীয়ে পঞ্জীয়ন কৰা এই ব্যাপক অনিয়ম, নম্বৰ তালিকাৰ বিকৃতকৰণ তথা সহকাৰী শিক্ষক নিযুক্তিত হস্তক্ষেপৰ গোচৰটোৰ তদন্তৰ দায়িত্ব চি বি আইক ল’বলৈ মেঘালয় উচ্চ ন্যায়ালয়ে যোৱা ২ নৱেম্বৰত নিৰ্দেশ দিছিল।

অভিযোগ মতে লিংডো আৰু তেওঁৰ দুজন সমৰ্থকে প্ৰাথমিক আৰু ৰাজহুৱা শিক্ষাৰ তদান্তীন সঞ্চালক জে ডে চাংমাক বগা ৰং ব্যৱহাৰ কৰি চাকৰিপ্ৰাৰ্থীৰ নম্বৰ তালিকাৰ নম্বৰ ইফাল-সিফাল কৰিবলৈ নিৰ্দেশ দিছিল। অভিযোগাকাৰীয়ে অভিযোগ কৰা মতে সহকাৰী শিক্ষক নিযুক্তি প্ৰক্ৰিয়াটোত মন্ত্ৰীজনে তেওঁৰ আন সহযোগীৰ সৈতে ব্যাপক হাৰত অনিয়ম কৰিছিল।

নিজৰ নিৰ্দেশনাটোত উচ্চ ন্যায়ালয়ে কয় যে এই বিষয়টো এটা নিৰপেক্ষ সংস্থাৰ দ্বাৰা পুংখাপুংখ আৰু গভীৰ অনুসন্ধানৰ প্ৰয়োজন আছে। এই অনুসন্ধানৰ ক্ষেত্ৰত আৰক্ষী উপযুক্ত পক্ষ নহয় আৰু কেলেংকাৰিটোত জড়িত সকলোকে তদন্তৰ আওতালৈ আনিবলৈ চি বি আইৰ প্ৰয়োজন।