নাগৰিকত্ব বিধেয়কক মূল বিষয় হিচাপে লৈ নিৰ্বাচনত অৱতীৰ্ণ হ’ব এন পি পি : কনৰাড

আসন্ন লোকসভা নিৰ্বাচনত কনৰাড চাংমা নেতৃত্বাধীন নেশ্যনেল পিপলছ পাৰ্টি (এন পি পি) দলে নগৰিকত্ব সংশোধনী বিধেয়কক মূল বিষয় হিচাপে গ্ৰহণ কৰিছে। শনিবাৰে গুৱাহাটীৰ লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰত সাংবাদিকৰ আগত এই কথা প্ৰকাশ কৰে দলটোৰ মুৰব্বী কনৰাড চাংমাই।

অসমত ইতিমধ্যে পাঁচটা সমষ্টিৰ বাবে প্ৰাৰ্থীৰ নাম ঘোষণা কৰা এন পি পিৰ নেতা কনৰাড চাংমাই কয় যে দলটোৱে নাগৰিকত্ব সংশোধনী বিধেয়কৰ বিৰোধিতা অব্যাহত ৰাখিব আৰু লোকসভা নিৰ্বাচনত এই বিষয়টো দলৰ মূল নিৰ্বাচনী বিষয় হিচাপে লোৱা হ’ব।

চাংমাই লগতে কয়,’’ এন পি পিকে ধৰি বহু লোকে নাগৰিকত্ব সংশোধনী বিধেয়কৰ বিৰুদ্ধে সৰৱ হৈছিল আৰু আমাৰ নিৰৱচ্ছিন্ন প্ৰচেষ্টাৰ বাবে বিধেয়কখন ৰাজ্যসভাত উত্থাপন নহ’ল। বিজেপিয়ে পুনৰ বিধেয়কখন অনাৰ কথা ইতিমধ্যে ঘোষণা কৰিছে, কিন্তু আমি তেওঁলোকক সেইটো কৰাত বাধা দিম।‘’

এন পি পি দলে এইবাৰ মেঘালয়ৰ বাহিৰে অসমকে ধৰি সমগ্ৰ উত্তৰ-পূৰ্বাঞ্চলতে প্ৰতিদ্বন্দ্বিতা আগবঢ়োৱাৰ সিদ্ধান্ত গ্ৰহণ কৰিছে। অসমকে ধৰি উত্তৰ-পূৰ্বাঞ্চলত শেহতীয়া সময়ত নাগৰিকত্ব সংশোধনী বিধেয়কলৈ ব্যাপক প্ৰতিবাদী কাৰ্যসূচী ৰূপায়ন কৰা হৈছিল। সেয়ে, অঞ্চলটোৰ আটাইতকৈ স্পৰ্শকাতৰ বিষয়টোক এন পি পিয়ে নিৰ্বাচনী বিষয় হিচাপে লৈ জনসমৰ্থন আদায়ৰ চেষ্টা চলাব।

উল্লেখযোগ্য যে যোৱা ১৩ ফেব্ৰুৱাৰিত ৰাজ্যসভাত নাগৰিকত্ব সংশোধনী বিধেয়কখন উত্থাপনত বিজেপি ব্যৰ্থ হোৱাৰ পাছত কনৰাড চাংমা নায়ক হৈ পৰিছিল। মেঘালয়ৰ মুখ্য মন্ত্ৰীগৰাকীয়ে বিধেয়কখনৰ বিৰুদ্ধে উত্তৰ-পূৰ্বাঞ্চলৰ আঞ্চলিক দলসমূহক ঐক্যবদ্ধ কৰাৰ ক্ষেত্ৰত আগভাগ লৈছিল।