লুইতপৰীয়া হিন্দু সন্মিলনৰ সমাপ্তিৰ পিছতে গুৱাহাটীত আৰ এছ এছৰ মাৰাথন বৈঠক
দেওবাৰে অনুষ্ঠিত লুইতপৰীয়া হিন্দু সন্মিলনৰ সমাপ্তিৰ পিছতে গুৱাহাটীত বাহৰ পাতি থকা আৰ এছ এছৰ শীৰ্ষ নেতৃত্ব বিভিন্ন ব্যক্তিৰ সৈতে মাৰাথন বৈঠকত মিলিত হয়। মহানগৰীৰ মণিৰাম দেৱান ট্ৰে’ড চেণ্টাৰত এই বৈঠক অনুষ্ঠিত হয়।
আৰ এছ এছৰ মুৰব্বী মোহন ভাগৱতৰ উপৰি কৃষ্ণগোপাল, ভায়াজী যোশী আদি শীৰ্ষ নেতা উপস্থিত থকা উক্ত বৈঠকখনত সংগঠনটোৰ সাংগঠনিক দিশসমূহক লৈ প্ৰধানকৈ আলোচনা কৰা হয়।
ফেব্ৰুৱাৰিত হ’বলগা নাগালেণ্ড, ত্ৰিপুৰা আৰু মেঘালয় বিধানসভা নিৰ্বাচনৰ প্ৰাকক্ষণত আয়োজিত এই বৈঠকে বিশেষ তাৎপৰ্য বহন কৰিছে। উক্ত তিনিওখন ৰাজ্যৰ সংঘৰ নেতা-কৰ্মীসকলেও অংশ লোৱা বৈঠকখনত ৰাজ্যকেইখনৰ আগন্তুক বিধানসভা নিৰ্বাচন সম্পৰ্কে বিশেষভাৱে আলোচনা কৰা হয়।
প্ৰাপ্ত তথ্য মতে কালি দিনজুৰি চলা আলোচনাৰ মাজতে আৰ এছ এছৰ মুৰব্বী মোহন ভাগৱতে ৰাজ্যিক বিজেপিৰ সভাপতি ৰঞ্জিত কুমাৰ দাসৰ সৈতে এক গুৰুত্বপূৰ্ণ আলোচনাত মিলিত হয়।
ইক’নমিক টাইমছত প্ৰকাশিত এক বাতৰি অনুসৰি সংগঠনটোৰ এজন জ্যেষ্ঠ নেতাই কয়,’আলোচনাটোত হিন্দুত্বক উত্তৰ-পূব ভাৰতৰ চুকে-কোণে লৈ যোৱাৰ সিদ্ধান্ত লোৱা হৈছে। বৰ্তমান অসম, মেঘালয় আৰু নাগালেণ্ডত আমাৰ ৯০৭ টা শাখা চলি আছে, আমি ইয়াক ১২০০টা লৈ বঢ়োৱাৰ পৰিকল্পনা কৰিছো।’
দেওবাৰৰ সন্মিলনত আৰ এছ এছৰ ৩৫,০০০ কেডাৰ আৰু প্ৰায় ৩৫,০০০ সাধাৰণ নাগৰিকে অংশগ্ৰহণ কৰে বুলি জানিবলৈ দি নেতাজনে কয় যে সংগঠনটোৰ মুৰব্বী মোহন ভাগৱতে তেওঁলোকক নতুন কেডাৰ সৃষ্টি কৰিবলৈ নিৰ্দেশ দিছে।
আনহাতে তিনিদিনীয়া কাৰ্যসূচীৰে গুৱাহাটীলৈ আহি সম্প্ৰতি বালাজী মন্দিৰৰ অতিথিশালাত বাহৰ পাতি থকা মোহন ভাগৱতক সাক্ষাৎ কৰিবলৈ মন্ত্ৰী-বিধায়কৰ লগতে বহু ভি আই পিয়ে আহি ভিৰ কৰা পৰিলক্ষিত হৈছে। জানিব পৰা মতে কালি অধ্যাপক ড০ ননীগোপাল মহন্ত, ৰাজ্যপাল জগদীশ মুখী আদিয়েও নেতাজনৰ লগত এক আলোচনাত মিলিত হয়। ৰাজ্যপাল অধ্যাপক মুখী ৰাষ্ট্ৰীয় স্বয়ংসেৱক সংঘৰো এগৰাকী সদস্য।