লোকটক হ্ৰদ সংৰক্ষণ: সংশ্লিষ্ট পক্ষৰ সৈতে আলোচনা আৰম্ভ কৰিলে আদালতৰ প্ৰতিনিধিয়ে
উত্তৰ পূৰ্বাঞ্চলৰ বৃহত্তম হ্ৰদ হিচাপে পৰিচিত লোকটক হ্ৰদৰ সংৰক্ষণ সন্দৰ্ভত সংশ্লিষ্ট পক্ষৰ সৈতে আলোচনা আৰম্ভ কৰিলে আদালতৰ প্ৰতিনিধিয়ে ।
উচ্চতম ন্যায়ালয়ৰ নিৰ্দেশ অনুযায়ী মণিপুৰ উচ্চ ন্যায়ালয়ৰ দুজনীয়া বিচাৰপীঠে যোৱা ৫ ফেব্ৰুৱাৰিত অধিবক্তা কেএইচ সমৰজিৎ আৰু ডি জুলিয়াছ ৰাইমেইক আদালতৰ প্ৰতিনিধি হিচাপে নিযুক্তি দিছিল। আনহাতে আদালতৰ প্ৰতিনিধি দুগৰাকীক হ্ৰদটোৰ সংৰক্ষণৰ অগ্ৰগতিৰ কামৰ খতিয়ান অহা ২৮ ফেব্ৰুৱাৰিৰ ভিতৰত দাখিল কৰিবলৈ নিৰ্দেশ দিছিল দুজনীয়া খণ্ড বিচাৰপীঠখনে।
উল্লেখ্য যে দেওবাৰে থৌবাল, পশ্চিম ইম্ফল আৰু বিষ্ণুপুৰ জিলাজুৰি বিস্তৃত হৈ থকা লোকটক হ্ৰদ পৰিদৰ্শনৰ পূৰ্বে আদালতৰ প্ৰতিনিধি দুগৰাকীয়ে হ্ৰদটোৰ মেৰামতিৰ বাবে উত্তৰদায়ী লোকটক উন্নয়ন কৰ্তৃপক্ষৰ সৈতে এক আলোচনাত মিলিত হয়।
উল্লেখ্য যে একেটা প্ৰসংগতে উচ্চ ন্যায়ালয়খনে ৰাজ্যৰ জলসম্পদ, বন আৰু পৰিৱেশ বিভাগক তিনি সপ্তাহৰ ভিতৰত শপতনামা দাখিলৰ নিৰ্দেশ দিছে। অনহাতে আদালতৰ প্ৰতিনিধি দুগৰাকীয়ে দেওবাৰে সদৌ লোকটক মাছমৰীয়া সন্থাৰ সৈতেও আলোচনাত মিলিত হৈ তেওঁলোকৰ সমস্যা তথা হ্ৰদটোৰ সুৰক্ষা সন্দৰ্ভত পৰামৰ্শ লিখিত ৰূপে দিয়াৰ আহ্বান জনায়।
তদুপৰি প্ৰদূষণ আৰু অন্যান্য সমস্যা পৰ্যবক্ষেণ কৰাৰ বাবে আদালতৰ প্ৰতিনিধি দুগৰাকীয়ে হ্ৰদটো পৰিদৰ্শন কৰে।
উল্লেখ্য যে হ্ৰদটোৰ সংৰক্ষণৰ বাবে সংশ্লিষ্ট সকলো পক্ষকে তেওঁলোকৰ যাৱতীয় পৰামৰ্শ দিবলৈ আহ্বান জনায় আদালতৰ প্ৰতিনিধি দুগৰাকীয়ে।