সোণাৰীত ৬ নগা যুৱকৰ হোটেলৰ স্বত্ত্বাধিকাৰী, মেনেজাৰ, কৰ্মচাৰীক প্ৰহাৰ

দেওবাৰে ৬ জন নগা যুৱকে শিৱসাগৰৰ সোণাৰীত এখন হোটেলৰ স্বত্ত্বাধিকাৰীৰ লগতে মেনেজাৰ আৰু হোটেলৰ বাকী কৰ্মচাৰী সকলকো প্ৰহাৰ কৰে।

প্ৰাপ্ত তথ্য মতে শিৱসাগৰৰ সোণাৰী চহৰৰ মাজমজিয়াত অৱস্থিত মা-কালী নামৰ হোটেলখনত ৬ জন নগা যুৱকে ভাত খাইছিল। নগা যুৱক কেইজনৰ হোটেলত ভাত খোৱাৰ বিনিময়ত বিল হৈছিল ৭৫০ টকা আৰু তেওঁলোকে বিল পৰিশেোধ কৰিছিল ৫০০ টকা। ফলত হোটেলৰ স্বত্ত্বাধিকাৰে সম্পূৰ্ণ বিল পৰিশোধ কৰিবলৈ কোৱাত নগা যুৱক কেইজনে হোটেলৰ মেনেজাৰ, স্বত্ত্বাধিকাৰী, কৰ্মচাৰী সকলোকে উপৰ্যুপৰি প্ৰহাৰ কৰিবলৈ আৰম্ভ কৰে।

মন কৰিব লগীয়া যে ঘটনা সংঘটিত কৰি নগা যুৱক কেইজন ঘটনাস্থলীৰ পৰা পলায়ন কৰিবলৈ খোজোতেই স্থানীয় ৰাইজে যুৱক কেইজনক ধৰি সোণাৰী আৰক্ষীক চমজাই দিয়ে। অৱশ্যে ইয়াৰে এজন নগা যুৱক পলাই যাবলৈ সক্ষম হয় বুলি জানিব পৰা গৈছে।

আনহাতে উক্ত নগা যুৱক কেইজনৰ প্ৰহাৰত গুৰুতৰভাৱে আহত হোটেলৰ মেনেজাৰ মান্না পালক চিকিৎসালয়ত ভৰ্তি কৰা হৈছে বুলি জানিব পৰা গৈছে।