সোমবাৰৰ পৰা মণিপুৰত আৰম্ভ হৈছে ৰাষ্ট্ৰীয় জুনিয়ৰ খো খো প্ৰতিযোগিতা
মণিপুৰত আজিৰ পৰা আৰম্ভ হৈছে ৰাষ্ট্ৰীয় জুনিয়ৰ খো খো চেম্পিয়নশ্বীপ। ইম্ফল চহৰৰ পৰা প্ৰায় ২৫ কিলোমিটাৰ নিলগত অৱস্থিত খাংগাৱকৰ বাসু খেলপথাৰত আজি এক আড়ম্বৰপূৰ্ণ অনুষ্ঠানৰ মাজেৰে প্ৰতিযোগিতাখনৰ শুভাৰম্ভণী হয়।
ৰাষ্ট্ৰীয় পৰ্যায়ৰ প্ৰতিযোগিতাখনৰ উদ্বোধনী অনুষ্ঠানত মুখ্য অতিথি হিচাপে উপস্থিত থাকে মণিপুৰৰ শিক্ষা আৰু শ্ৰম মন্ত্ৰী টি ৰাধেশ্যাম আৰু ইয়াৰ লগতে উপস্থিত থাকে ৱাংজিং-টেন্থাৰ বিধায়ক পাওনাম ব্ৰজেন।
ইয়াৰ উপৰি বৰ্ণিল উদ্বোধনী অনুষ্ঠানত খো খো ফেডাৰেশ্যন অৱ ইণ্ডিয়াৰ বিষয়ববীয়া এমএছ টয়াগী, বিএছ ট্ৰীথী আৰু উত্তৰ-পূৰ্বাঞ্চল শাখাৰ সভাপতি আৰপি বৰুৱা উপস্থিত থাকে।
মণিপুৰ খো খো সন্থাৰ উদ্যোগত আৰু থৌবাল জিলা প্ৰশাসনৰ সহযোগত পাঁচ দিনীয়া কাৰ্যসূচীৰে এই প্ৰতিযোগিতাখন আয়োজন কৰা হৈছে।
উল্লেখ্য যে দেশৰ বিভিন্ন প্ৰান্তৰ পৰা প্ৰায় ১০০০ৰৰো অধিক খো খো খেলুৱৈৰ লগতে বিষয়ববীয়া তথা খো খো ফেডাৰেশ্যন অৱ ইণ্ডিয়াৰ সদস্যসকলে এই ৰাষ্ট্ৰীয় জুনিয়ৰ প্ৰতিযোগিতাখনত অংশগ্ৰহণ কৰিব বুলি জানিব পৰা গৈছে।
আনহাতে আজিৰ পৰা আৰম্ভ হোৱা প্ৰতিযোগিতাখনৰ উদ্বোধনী অনুষ্ঠানত সাংস্কৃতিক অনুষ্ঠানো পৰিৱেশন কৰা হয়। সাংস্কৃতিক অনুষ্ঠান পৰিৱেশন কৰে অসমৰ জনপ্ৰিয় কণ্ঠশিল্পী ড০ সংগীতা কাকতিয়ে।
খাংগাৱকৰ বাসু খেলপথাৰত আয়োজিত উদ্বোধনী অনুষ্ঠানত সংগীতা কাকতিৰ যাদুকৰী কণ্ঠত উপস্থিত থকা বিশিষ্ট অতিথি তথা দৰ্শকসকল মুগ্ধ হৈ পৰে।