স্বচ্ছ পৰিৱেশ নহয়, চৰকাৰে প্ৰথমে এনেকুৱা সামাজিক পৰিৱেশ গঢ়ক, য’ত মানৱতা লুণ্ঠিত নহয় : অপূৰ্ব ভট্টাচাৰ্য্য

“চৰকাৰে প্ৰথমতে স্বচ্ছ পৰিৱেশ গঢ়িব নালাগে, প্ৰথমে সামাজিক পৰিৱেশ গঢ়ক, য’ত মানৱতা লুণ্ঠিত নহয়। শান্তিৰ নীড়ত যাতে আমি তেজৰ তুমুৰলি খেলাৰ কান্দোন শুনিব লগীয়া নহয়।”

আজি ৰাজীৱ ভৱনত এক সংবাদমেল সম্বোধন কৰি অসম প্ৰদেশ কংগ্ৰেছ কমিটীৰ জ্যেষ্ঠ মুখপাত্ৰ অপূৰ্ব ভট্টাচাৰ্য্যই এই মন্তৱ্য কৰে।

উক্ত সংবাদমেলতে তেওঁ যুৱক দুজনৰ হত্যাকাণ্ডত শোকপ্ৰকাশ কৰি কয় “দুগৰাকী সম্ভাৱনাময়ী যুৱক, প্ৰকৃতিপ্ৰেমী তথা সংগীত জগতৰ সৈতে জড়িত অভিজিৎ নাথ আৰু নীলোৎপল দাসক যিধৰণে বৰ্বৰভাৱে মৃত্যুমুখলৈ থেলি দিয়া হ’ল, সেই কাণ্ডক অসম প্ৰদেশ কংগ্ৰেছ কমিটীয়ে কঠোৰ ভাষাৰে নিন্দা কৰিছো।”

তাৎপৰ্য্যপূৰ্ণভাৱে কালি কাৰ্বি আংলঙত হোৱা ঘটনাটোক “সভ্য সমাজৰ নামত এক কলংক” বুলিও অভিহিত কৰাৰ লগতে কয়, “দুয়োগৰাকী নিৰপৰাধী নিৰীহ যুৱকৰ মৃত্যুত অসম প্ৰদেশ কংগ্ৰেছ কমিটীয়ে গভীৰ শোক প্ৰকাশ কৰিছো। শোকসন্তপ্ত পৰিয়ালবৰ্গক সান্ত্বনা দিবৰ বাবে আমাৰ ওচৰত কোনো ভাষা নাই।” ভট্টাচাৰ্য্যই কয়।

যুৱক দুজনৰ আক্ৰমণ কৰাৰ পৰিৱেশ সম্পৰ্কে ৰাজ্যৰ আৰক্ষী মহল সজাগ নথকাটো দুৰ্ভাগ্যজনক আখ্যা দি তেওঁ কয়, “যিটো সময়ত ৰাজ্যৰ বাহিৰৰ পৰা এটা দলৰ আগমন ঘটিছে বুলি ছ’চিয়েল মিডিয়াৰ জৰিয়তে আতংকিত এটা উৰাবাতৰি অতি দ্ৰুতগতিত প্ৰচাৰ হৈছিল, সেই সময়ত অসম আৰক্ষীৰ চাইবাৰ অপৰাধ নিয়ন্ত্ৰণ বিভাগটো ক’ত আছিল? ছ’চিয়েল মিডিয়াই পৰিস্থিতিৰ ৰূপ সলনি কৰিব পাৰে বুলি অসম আৰক্ষী কি কাৰণত সামান্যতমো নিশ্চিত নাছিল।”

“জনসাধাৰণৰ জীৱন আৰু সম্পত্তিৰ নিৰাপত্তা প্ৰদান কৰাটো এখন চৰকাৰৰ প্ৰথম আৰু প্ৰাথমিক দায়বদ্ধতা।” এনেদৰে উল্লেখ কৰি তেওঁ লগতে কয়, “মুখ্য মন্ত্ৰীৰ হাতত ন্যস্ত গৃহ বিভাগে সান্ত্বনা দিলেই পৰিস্থিতি শান্ত হৈ নাযায়, এই কথাষাৰ ভালদৰে হৃদয়ংগম কৰা উচিত।”

তেওঁ অভিযোগ কৰে, “সাম্প্ৰতিক বিজেপি চৰকাৰখনে শাসনলৈ অহাৰ পিছৰে পৰা আমাৰ সমাজ জীৱনত অব্যাহত থকা সাতামপুৰুষীয়া একতা, সংহতি, বিশ্বাস আৰু পাৰস্পৰিক বন্ধুত্ব সেইবোৰ ক্ৰমান্বয়ে হ্ৰাস পাব ধৰিছে। বিশ্বাসৰ সলনি অবিশ্বাস আৰু পৰিকল্পিত ধাৰণাৰে সমাজত যি ত্ৰাসৰ সৃষ্টি কৰি থকা হৈছে তাৰ বিপৰীতে ৰাজ্য চৰকাৰে কিবা ব্যৱস্থা গ্ৰহণ কৰিছেনে?”

কাৰ্বি আংলঙৰ ঘটনাটোৱেই একমাত্ৰ ঘটনা নহয় বুলি উল্লেখ কৰি তেওঁ কয় যে একে সময়তে ঢেকীয়াজুলি বিধানসভাৰ অন্তৰ্গত মিছামাৰিত মূকবধিৰ তথা মানসিক বিকাৰগ্ৰস্ত লোক এগৰাকী এনে সন্দেহৰ বলি হ’ল, বিশ্বনাথৰ এগৰাকী বৃদ্ধ ডাইনী সন্দেহত একেই ঘটনাৰ বলি হ’ল।

তাৎপৰ্য্যপূৰ্ণভাৱে কাৰ্বি আংলঙক জিলা উপায়ুক্তই সেই ঠাইলৈ গ’লে জিলা প্ৰশাসনৰ অনুমতি ল’ব লাগে বুলি কৰা মন্তব্যৰ ঘোৰ বিৰোধিতা কৰি তেওঁ কয় ‘অভিজিৎ আৰু নীলোৎপল বিদেশী পৰ্য্যটক আছিল নেকি? তেওঁলোক ঘৰৰ ল’ৰা ঘৰৰ ভিতৰৰে ক’ৰবাত যাওঁতে অনুমতিৰ প্ৰশ্ন ক’ৰ পৰা আহে?

“জিলা প্ৰশাসনে সোপাধৰা, ডাইনী আৰু মানুহৰ অংগ কাঢ়ি নিয়া এটা সু-সংগঠিত দলৰ ৰাজ্যখনত প্ৰৱেশ কৰিছে বুলি এটা বাতৰি যেতিয়া সকলোৰে মুখে-মুখে আছিল, কিয় স্পৰ্শকাতৰ অঞ্চলসমূহত ৰাইজক সচেতন কৰিবলৈ আহ্বান জনোৱাৰ ব্যৱস্থা হাতত নল’লে?” জিলা প্ৰশাসনক প্ৰশ্ন কৰে ভট্টাচাৰ্য্যই।