সৰ্বাধিক কাল মুখ্য মন্ত্ৰীৰ পদত থকাৰ অভিলেখ ছিকিমৰ পৱন কুমাৰ চামলিঙৰ

পশ্চিম বংগৰ প্ৰাক্তন মুখ্য মন্ত্ৰী জ্যোতি বসুৰ অভিলেখ ভাঙি দেশৰ ভিতৰতে আটাইতকৈ বেছিকালৰ বাবে পদবীত থকা মুখ্য মন্ত্ৰীত পৰিণত হৈছে ছিকিমৰ মুখ্য মন্ত্ৰী পৱন কুমাৰ চামলিং ( Chamling )।

সৰ্বাধিক সময়ৰ বাবে মুখ্য মন্ত্ৰী হৈ থকাৰ এই অভিলেখ চামলিঙে ছিকিমৰ ৰাইজলৈ উচৰ্গা কৰিছে।

ছিকিমৰ জনসাধাৰণৰ সমৰ্থন আৰু সহযোগিতাৰ বাবেই তেওঁ এই অভিলেখ ভাঙিব পাৰিলে বুলি উল্লেখ কৰি এক বিবৃতিত চাম্লিঙে কয় ‘এই ব্যক্তিগত মাইলৰ খুঁটি অতিক্ৰম কৰা সময়ত দুই দশকতকৈও অধিক কালজোৰা এই যাত্ৰাত ভাগ দিয়া সকলোকে মই মৰমেৰে স্মৰণ কৰিব খুজিছো। ৰে’কৰ্ডসংখ্যক পাঁচ বাৰৰ বাবে জনাদেশ দি মোৰ ওপৰত আস্থা ৰখাৰ বাবে প্ৰথমেই ছিকিমৰ জনসাধাৰণক মোৰ অন্তৰৰ কৃতজ্ঞতা যাচিছো।’

জ্যোতি বসুক তেওঁ সৰ্বাধিক সন্মান কৰা এগৰাকী মহান ৰাষ্ট্ৰনেতা বুলি মন্তব্য কৰি চাম্লিঙে লগতে কয় ‘এই গুৰুত্বপূৰ্ণ মুহূৰ্তত প্ৰয়াত জ্যোতি বসুৰ প্ৰতিও মই মোৰ শ্ৰদ্ধা জনাইছো।… মই সৌভাগ্যৱান যে সৰ্বাধিক সময়ৰ বাবে মুখ্য মন্ত্ৰী হৈ থকাৰ তেওঁৰ ৰে’কৰ্ড মই অতিক্ৰম কৰিছো।’

তেওঁ কয় যে দুখীয়াসকল আৰু জনসাধাৰণৰ হিতকৰ নীতিৰে তেওঁৰ ২৩ বছৰতকৈও অধিককালৰ শাসনত ছিকিমে সকলো ক্ষেত্ৰতে দ্ৰুত আৰু অভূতপূৰ্ব উন্নয়নৰ মুখ দেখিছে।

‘এই ২৩ বছৰ ৪ মাহ আৰু ১৭ দিনৰ কাৰ্য্যকালত মই সৰ্বোচ্চ আন্তৰিকতা আৰু নিষ্ঠাৰে কাম কৰিছো’ বুলি দাবী কৰি তেওঁ কয় ‘মোৰ কৰ্তব্যৰ পৰা মই এদিনো ছুটী লোৱা নাই।’

তেওঁ কয় যে দৰিদ্ৰতা-মুক্ত ৰাজ্য হিচাপে ছিকিমে শিক্ষা, স্বাস্থ্য আৰু গ্ৰাম্য উন্নয়নৰ ক্ষেত্ৰত দেশৰ শীৰ্ষত অৱস্থান কৰিছে।

মুখ্য মন্ত্ৰীগৰাকীয়ে লগতে কয় ‘আমাৰ পৰিৱেশ-অনুকূল পৰ্য্যটন নীতিয়ে ছিকিমক আটাইতকৈ জনাজাত আৰু আটাইতকৈ আকৰ্ষণীয় পৰ্য্যটন থলীলৈ পৰিৱৰ্তিত কৰিলে।