হাতীগাওঁ ব্যৱসায়ীৰ হত্যাকাণ্ডৰ সৈতে জড়িত ৪ জনক গ্ৰেপ্তাৰ

কালি মহানগৰ আৰক্ষীয়ে এক অভিযান চলাই হাতীগাঁৱৰ ব্যৱসায়ী হেমন্ত চৌৰাচিয়াৰ হত্যাৰ লগত জড়িত ৪ জনক গ্ৰেপ্তাৰ কৰিবলৈ সক্ষম হৈছে।

ধৃত লোককেইজনৰ নাম অভয়াপুৰীৰ ছফিকুল ইছলাম, দক্ষিণ শালমৰাৰ নুৰ আলম মোল্লা, ৰমেশ যাদৱ আৰু মুকুতা দাস বুলি জানিব পৰা গৈছে।

ব্যৱসায়ীজনৰ হত্যাকাৰীক গ্ৰেপ্তাৰ কৰা সন্দৰ্ভত আৰক্ষী আয়ুক্ত হীৰেন নাথে আজি এখন সংবাদমেল পাতি কয়, ‘কালি আৰক্ষীৰ দল কেইবাটাও শাখাত ভাগ হৈ লোককেইজনৰ সন্ধানত অভিযান চলাইছিল। পূব গুৱাহাটীৰ আৰক্ষী আয়ুক্ত, পূব গুৱাহাটী অতিৰিক্ত আৰক্ষী আয়ুক্ত আৰু অপৰাধ শাখাৰ অতিৰিক্ত আৰক্ষী অধীক্ষকৰ সৈতে যোৱা আৰক্ষীৰ দলে হত্যাকাণ্ডটোৰ লগত জড়িত ৪ জন লোকক গ্ৰেপ্তাৰ কৰে।’

হত্যাকাণ্ডৰ সৈতে জড়িত ৰমেশ যাদৱে ডিমাপুৰৰ পৰা ৯ এম এম পিষ্টলটো আনি দিয়া বুলি নাথে জানিবলৈ দিয়ে।

তেওঁৰ মতে, ‘ছয়গাঁৱৰ মুকুতা দাসৰ ঘৰত হত্যাকাণ্ডৰ সৈতে জড়িত গোটেইকেইজনে বাহৰ পাতি আছিল।’

ধৃত লোককেইজনৰ কবলৰ পৰা এটা ৯ এম এম পিষ্টল আৰু ৪ জাঁই সক্ৰিয় গুলী তথা ২৫ হেজাৰ টকা উদ্ধাৰ কৰা হয় বুলি নাথে জানিবলৈ দিয়ে।

আনহাতে আৰক্ষীৰ জেৰাত ছফিকুল ইছলামে ব্যৱসায়ীজনক গুলী মৰাৰ কথা স্বীকাৰ কৰিছে বুলি তেওঁ জানিবলৈ দিয়ে।

ব্যৱসায়ী হেমন্ত চৌৰাচিয়াৰ বেগত ৪,০৬,০০০ টকা আছিল বুলি উল্লেখ কৰি নাথে কয় যে ইয়াৰে ১ লাখ টকা ছফিকুলে লাভ কৰে।

৭ জনীয়া হত্যাকাৰীৰ দলটোৰ বাকী ৩ জনক বিচাৰি অভিযান চলাই আছে যদিও আৰক্ষীয়ে বৰ্তমানলৈকে কৰায়ত্ত কৰিব পৰা নাই বুলি আয়ুক্ত নাথে জানিবলৈ দিয়ে।

ধৃত দুই অভিযুক্ত ৰমেশ যাদৱ আৰু মুকুতাৰ জেইলত চিনাকি হোৱা বুলি সদৰী কৰি নাথে কয় যে চফিকুলক বন্দুক চলাব পৰাৰ বাবে মোল্লা আৰু অন্য এজনে অভয়াপুৰীৰ পৰা লৈ যায়।

তেওঁৰ মতে, ‘উক্ত সাত গৰাকী হত্যাকাৰীৰ ভিতৰত দুজনমান শিক্ষিত যুৱকো জড়িত আছে, তেওঁলোকে লেপটপ, মোবাইলৰ প্ৰযুক্তিগত দিশটো ভালদৰে ব্যৱহাৰ কৰিব জানে।’

হত্যাকাণ্ডটোত নিহত হেমন্ত চৌৰাচিয়াৰ হাতীগাওঁ থানাৰ ওচৰৰ কৈলাস নগৰত এখন গেলামালৰ দোকান আছিল। দোকান বন্ধ কৰি ঘৰলৈ যাবলৈ লওঁতেই মটৰ চাইকেলত অহা দুৰ্বৃত্তই তেওঁক গুলীয়াইছিল।

গুলীবিদ্ধ হেমন্তক চিকিৎসালয়লৈ নিয়া হৈছিল যদিও কিছু সময়ৰ পিছতে তেওঁৰ মৃত্যু হয়।