১৪ সংখ্যক কেপ্টেইন জিন্তু গগৈ সোঁৱৰণী ফুটবল প্ৰতিযোগিতাৰ খিতাপ দখল যোৰহাট টাউন ক্লাবৰ

১৪ সংখ্যক কেপ্টেইন জিন্তু গগৈ সোঁৱৰণী ফুটবল প্ৰতিযোগিতাৰ আজি ডিব্ৰুগড় প’ল’ গ্ৰাউণ্ডত হোৱা  চূড়ান্ত খেলখনত যোৰহাট টাউন ক্লাবে বি ডিভিজন একাদশ ডিব্ৰুগড় ফুটবল ক্লাবক ১-০ গ’লত পৰাজিত কৰে। প্ৰতিযোগিতাখনৰ আয়োজক আছিল নৱম ৰাজপুতনা ৰাইফলচ। যোৰহাট টাউন ক্লাবৰ হৈ খেলখনৰ ৫৬ মিনিটত একমাত্ৰ গ’লটো দিয়ে দীপাংকৰ মুছাহাৰীয়ে।

প্ৰতিযোগিতাখনত ৰাজ্যৰ মুঠ ১৬ টা দলে অংশ গ্ৰহণ কৰিছিল। ডিব্ৰুগড় ফুটবল ক্লাবৰ অৰ্জুন কৰ্মকাৰ প্ৰতিযোগিতাখনৰ শ্ৰেষ্ঠ গ’লৰক্ষক ঘোষিত হোৱাৰ বিপৰীতে যোৰহাট টাউন ক্লাবৰ দীপাংকৰ মুছাহাৰীক শ্ৰেষ্ঠ খেলুৱৈৰূপে ঘোষণা কৰা হয়। বিজয়ী দলক এটা ট্ৰফী আৰু ৭৫ হাজাৰ টকাৰ এখন চেক প্ৰদান কৰা হয়।

উল্লেখযোগ্য যে পল’ গ্ৰাউণ্ডত এয়ে প্ৰথমবাৰৰ বাবে প্ৰতিযোগিতাখন আয়োজন কৰা হৈছিল।

খেলখনত উপস্থিত থাকি দিয়া ভাষণত দাও ডিভিজনৰ জেনেৰেল অফিচাৰ কমাণ্ডিং মেজৰ জেনেৰেল গজেন্দ্ৰ সিঙে অসমৰ যুৱ প্ৰজন্মক কেপ্টেইন জিন্তু গগৈক আদৰ্শ হিচাপে ল’বলৈ আৰু দেশৰ প্ৰগতিৰ বাবে কঠোৰ পৰিশ্ৰম কৰিবলৈ আহ্বান জনায়। গজেন্দ্ৰ সিঙে অভূতপূৰ্ব সঁহাৰিৰে প্ৰতিযোগিতাখনক বৃহৎভাৱে সফল কৰি তোলাৰ বাবে উপস্থিত দৰ্শকক ধন্যবাদ জ্ঞাপন কৰে।

কেপ্টেইন জিন্তু গগৈৰ দেউতাক প্ৰাক্তন ফ্লাইং অফিচাৰ টি আৰ গগৈ আৰু নৱম ৰাজপুতনা ৰাইফলচৰ কমাণ্ডিং অফিচাৰ কৰ্নেল মুকেশ পাণ্ডেও অনুষ্ঠানটোত উপস্থিত আছিল।

শত্ৰুৰ বিৰুদ্ধে যুঁজাৰ ক্ষেত্ৰত দেখুওৱা বীৰত্ব আৰু সাহসৰ বাবে জিন্তু গগৈক মৰণোত্তৰভাৱে বীৰচক্ৰ সন্মান প্ৰদান কৰা হৈছিল।