ডিব্ৰুগড় জিলাত স্বচ্ছ ভাৰত অভিযানৰ অধীনত ১৫০০ শৌচাগাৰ নিৰ্মান কৰিব

জনস্বাস্থকাৰী বিভাগৰ উদ্যোগত ডিব্ৰুগড় জিলাৰ ১৫০০ পৰিয়ালক শৌচাগাৰ নিৰ্মান কৰি দিয়াৰ উদ্দেশ্যেৰে আজি ডিব্ৰুগড় উপায়ুক্ত লয়া মাডুৰিৰ উপস্থিতিত অইল ইণ্ডিয়া লিমিটেডে জিলা জল আৰু অনাময় কমিতিৰ সৈতে এক চুক্তিত স্বাক্ষৰ কৰে। অইলৰ হৈ ইডি (এইচ আৰ & এ) প্ৰাণজিৎ ডেকাই চুক্তিখনত হস্তাক্ষৰ কৰে।

স্বচ্ছ ভাৰত অভিযানৰ অন্তৰ্গত আচঁনিত ডিব্ৰুগড় জিলাক মলত্যাগ মুক্ত জিলা হিচাপে প্ৰতিষ্ঠাৰ লক্ষৰে ১৫০০ শৌচাগাৰ নিৰ্মান কৰাৰ বাবে অইলৰ সৈতে এই চুক্তি সম্পন্ন কৰা হয় বুলি উপায়ুক্ত লয়া মাডুৰিয়ে ব্যক্ত কৰে। ‘আমি সকলো লোকৰ লগতে দল-সংগঠনকো আহ্বান কৰিছো যে আমাৰ এই মলত্যাগ মুক্ত অভিযানত পূৰ্ণ সহযোগিতা কৰক’। এইদৰে উপায়ুক্তই অনুৰোধ জনায়।

উল্লেখযোগ্য যে ভাৰতৰ সকলো গাৱঁকে মলত্যাগ মুক্ত কৰাৰ বাবেই কেন্দ্ৰীয় চৰকাৰে স্বচ্ছ ভাৰত অভিযানৰ অংশস্বৰুপে এই আচঁনিৰ ৰূপায়ন কৰিছিল। সেই উদ্দেশ্য আগত ৰাখিয়েই অসম চৰকাৰৰ জিলা জল আৰু অনাময় কমিতিৰ সহযোগত অসমৰ সমগ্ৰ গাওঁৰ লগতে ডিব্ৰুগড় জিলাও মলত্যাগ মুক্ত কৰাৰ প্ৰয়াস কৰি থকা হৈছে।

‘অইল ইণ্ডিয়া লিমিটেডে ডিব্ৰুগড় জিলাত ১৫০০ পৰিয়ালক বিনামূলীয়া শৌচাগাৰ নিৰ্মান কৰাৰ বাবেই ১.৮০কোটি টকাৰ অনুদান আগবঢ়াইছে। গাওঁ অঞ্চলৰ সৰহ সংখ্যক লোকৰে শৌচাগাৰ নিৰ্মান কৰিবলৈ সামৰ্থ নাই সেয়েহে আমাৰ এই অভিযান সফল কৰাৰ বাবে সকলো লোকে সহযোগিতা আগবঢ়াই যেণ’।