৩০ মে’ৰ ভিতৰত কৰ্মচাৰীৰ সমস্যাসমূহ সমাধানৰ দাবী কৰ্মচাৰী পৰিষদৰ

সদৌ অসম কৰ্মচাৰী পৰিষদে ৰাজ্যখনৰ কৰ্মচাৰী সমাজখনৰ স্বাৰ্থত উত্থাপন কৰা কেতবোৰ সমস্যা ৩০ মে’ৰ ভিতৰত আলোচনাৰ মাধ্যমেৰে সমাধান কৰিবলৈ দাবী উত্থাপন কৰিছে। ৬ মে’ত শিলচৰত অনুষ্ঠিত পৰিষদৰ কেন্দ্ৰীয় কাৰ্যকৰী সমিতিৰ সভাত এই দাবী উত্থাপন কৰা হয়।

দৰমহা আসোঁৱাহ সমিতিৰ প্ৰতিবেদন ৰাজহুৱা কৰাৰ লগতে উল্লেখিত আসোঁৱাহসমূহ দূৰীকৰণ, ৰাজ্যিক কৰ্মচাৰী তথা পেঞ্চনাৰসকলৰ বাবে বিনামূলীয়া চিকিৎসা সেৱা আঁচনিৰ প্ৰৱৰ্তন কৰা, ৰাজ্যখনৰ বিভিন্ন  বিভাগত কৰ্মৰত কেজুৱেল, ফিক্সড্‌ পে, মাষ্টাৰৰোল কৰ্মচাৰীৰ দৰমহা তথা অন্যান্য সা-সুবিধা বৃদ্ধি কৰা, সংশোধিক দৰমহা ১ জানুৱাৰী, ২০১৬ তাৰিখৰ পৰা কাৰ্যকৰী কৰা, দৰমহাৰ সংশোধনীৰ বাবদ পাবলৈ বাকী থকা ২১ মাহৰ বকেয়া আদায় দিয়া আদি বিভিন্ন দাবীৰ কথা ইতিমধ্যে তেওঁলোকে চৰকাৰক জনাই আহিছে।

তদুপৰি,  সংশোধিত বিত্তীয় উন্নীতকৰণৰ ব্যৱস্থা সবলীকৰণ কৰা, ৰাজ্যখনৰ বিভিন্ন আঁচনিত ঠিকাভিত্তিত নিযোজিত কৰ্মচাৰীসকলক উপয়ুক্ত দৰমহা দিয়া আৰু তেওঁলোকৰ চাকৰিৰ নিৰাপত্তা নিশ্চিত কৰা, অৱসৰপ্ৰাপ্ত কৰ্মচাৰীৰ মৃত্যুৰ পাছত অবিবাহিতা কন্যাক আজীৱন পেঞ্চন দিয়াৰ ব্যৱস্থা কৰা, প্ৰাথমিক পৰ্যায়ৰ শিক্ষকৰ দৰমহাৰ বিভ্ৰান্তি দূৰ কৰা আৰু বিদ্যালয় প্ৰাদেশিকীকৰণৰ ক্ষেত্ৰত থকা অচলাৱস্থা দূৰ কৰা আদি সমস্যাসমূহ ৰঙালী বিহুৰ আগতে পৰিষদৰ লগতে  আলোচনাৰে মীমাংসাৰ ব্যৱস্থা কৰিবলৈ চাৰি এপ্ৰিলত গুৱাহাটীত অনুষ্ঠিত হোৱা পৰিষদৰ কৰ্ণধাৰ সমিতিৰ সভাই ৰাজ্য চৰকাৰলৈ আহ্বান জনাইছিল।

পৰিষদৰ কৰ্ণধাৰ সমিতিৰ এনে আবেদনৰ কথা অসমৰ মুখ্যমন্ত্ৰী, বিত্ত মন্ত্ৰী আৰু মুখ্য সচিবক যথাসময়ত পত্ৰযোগে অৱগত কৰা হৈছিল।

যোৱা ৬ মে’ত শিলচৰত অনুষ্ঠিত সভাত বিষয়টো পুনৰ আলোচনা কৰা হয়। কৰ্মচাৰীৰ সমস্যা সমাধানৰ ক্ষেত্ৰত চৰকাৰে দেখুওৱা উদাসীনতাত সভাই গভীৰ উদ্বেগ প্ৰকাশ লগতে অহা ৩০ মে’ৰ ভিতৰত উত্থাপিত দাবীকেইটা আলোচনাৰ জৰিয়তে মীমাংসাৰ ব্যৱস্থা নকৰিলে চৰকাৰৰ বিৰুদ্ধে প্ৰতিবাদী কাৰ্যসূচী ঘোষণা কৰিবলৈ কেন্দ্ৰীয় সমিতিয়ে পৰিষদৰ কৰ্ণধাৰ সমিতিক কৰ্তৃত্ব প্ৰদান কৰিছে।

সেয়েহে উক্ত সিদ্ধান্তৰ পথত আগবঢ়াৰ পূৰ্বে ৩০ মে’ৰ আগতে সমস্যাসমূহ সমাধানৰ ব্যৱস্থা কৰিবলৈ সদৌ অসম কৰ্মচাৰী পৰিষদৰ সভাপতি বাসৱ চন্দ্ৰ কলিতা আৰু সম্পাদকপ্ৰধান ফকৰউদ্দিন আহমেদে ৰাজ্য চৰকাৰৰ প্ৰতি আহ্বান জনাইছে।