৪ ফ্ৰেব্ৰুৱাৰীৰ পৰা সংস্কাৰ ভাৰতী পূৰ্ব্বোত্তৰৰ তৃতীয় ভৰতমুণি নাট্য সমাৰোহ

ভাৰতৰ এটা সাংস্কৃতিক বেচৰকাৰী অনুস্থান সংস্কাৰ ভাৰতীৰ উত্তৰ-পূৰ্বাঞ্চল শাখাই অহা ৪ ফেব্ৰুৱাৰিৰ পৰা ৫ দিনীয়া কাৰ্যসূচীৰে মহানগৰীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰৰ মাধৱদেৱ আন্তৰ্জাতিক প্ৰেক্ষাগৃহত ‘তৃতীয় ভৰতমুনি নাট্য সমাৰোহ’ অনুষ্ঠিত কৰিব। মঙলবাৰে গুৱাহাটী প্ৰেছ ক্লাৱত সংস্কাৰ ভাৰতীৰ উত্তৰপূৱ শাখাই আয়োজন কৰা সংবাদ মেলৰ জৰিয়তে এই কথা সদৰি কৰে।

উদ্যোক্তা সমিতিৰ সভাপতি জীতেন শৰ্মাই জানিবলৈ দিয়া মতে তেওঁলোকে নাট্য শাস্ত্ৰৰ পিতৃস্বৰূপ ভৰত মুনিৰ ওপজা দিন উপলক্ষে বিগত দুই বছৰৰ দৰে এই বছৰো নাট্য সমাৰোহৰ আয়োজন কৰাৰ দিহা কৰিছে। ইয়াৰ উপৰি তেওঁলোকে ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত প্ৰদৰ্শিত হোৱা ৮ খন নাটক এই নাট্য সমাৰোহৰ বাবে নিৰ্বাচন কৰি উলিয়াইছে বুলি উক্ত সংবাদমেলৰ জৰিয়তে জানিবলৈ দিয়ে।

উল্লেখযোগ্য যে এই নাট্য সমাৰোহত অসম, নাগালেণ্ড, মণিপুৰ, ত্ৰিপুৰা, মহাৰাষ্ট্ৰ আৰু উত্তৰপ্ৰদেশ ৰাজ্যকেইখনৰ আঠটাকৈ নাট্যদলে অংশগ্ৰহণ কৰিব।

৪ ফেব্ৰুৱাৰীৰ দিনা সন্ধিয়া ৫:৩০ বজাত উদ্বোধনী হ’বলগীয়া এই নাট্য সমাৰোহৰ প্ৰথমতে মণিপুৰৰ ট্ৰেজাৰ আৰ্ট এচ’চিয়েশ্যনৰ দ্বাৰা চাজিদা চাজিৰৰ পৰিচালিত তথা মোহন যোশীৰ লিখিত নাটক ‘’তামাচা এ নৌতংকি’’ মঞ্চস্থ কৰা হ’ব।

অনুস্থানটোৰ সভাপতি জীতেন শৰ্মাই জনোৱা অনুসৰি ৫ ফেব্ৰুৱাৰিৰ বিয়লি ৫:৪৫ বজাত নাগালেণ্ডৰ জ্যোতিস্মান নাট্যদলৰ শিল্পীসকলে ৰিপম ভৰদ্বাজৰ দ্বাৰা পৰিচালিত নাগা ভাষাৰ নাটক ‘কেশৰী’ মঞ্চস্থ কৰিব। লগতে সেইদিনাই ৬-১৫ বজাত বেনাৰসৰ শ্ৰীনগৰী নাট্য মণ্ডলীৰ দ্বাৰা অৰ্পিত শিধোৰৰ পৰিচালনাৰে মহাকবি ব্যাসৰ ৰচিত সংস্কৃত ভাষাৰ নাটক ‘মধ্যম ব্যায়োগ’ মঞ্চস্থ কৰিব।

তদুপৰি ৬ ফেব্ৰুৱাৰিৰ বিয়লি ৪:৪৫ বজাত গোৰক্ষপুৰৰ নাট্যদল দৰ্পনৰ শিল্পীসকলে শ্ৰীশান্ত কুমাৰ শ্ৰী বাস্তৱৰ পৰিচালনাত হিন্দী নাটক ‘ৰশ্মিৰথী’ আৰু ৬:১৫ বজাত ত্ৰিপুৰাৰ খোৱাইৰ নাট্যদল কালচাৰেল কেম্পেইনৰ দ্বাৰা সঞ্জয় কঔৰৰ পৰিচালনাত বাংলা ভাষাৰ নাটক ‘গুদ্দু গুদিৰ দুনীয়া’ মঞ্চস্থ কৰিব।

৭ ফেব্ৰুৱাৰীৰ সন্ধিয়া ৬ বজাত গুৱাহাটীৰ নাট্যদল ভইছ থিয়েটাৰ আৰু বি জালান প্ৰডাকচনৰ দ্বাৰা মানিক ৰয়ৰ পৰিচালনাত জীতেন শৰ্মাৰ ৰচিত ‘শ্ৰীমন্ত শংকৰদেৱ’ মঞ্চস্থ কৰিব। উল্লেখযোগ্য যে এই নাটকখন হিন্দী ভাষাত মঞ্চস্থ কৰা হ’ব। উদ্যোক্তা কমিটিয়ে জানিবলৈ দিয়া মতে শংকৰদেৱৰ সৃষ্টিৰাজীৰ বিষয়ে অসমৰ বাহিৰৰ ৰাজ্যসমূহে বুজাত সহায়ক হোৱাৰ বাবে এই নাটকখন হিন্দী ভাষাত মঞ্চস্থ কৰিব।

নাট্য সমাৰোহৰ অন্তিম দিনা সন্ধিয়া ৬ বজাত মুম্বাইৰ এটি নাট্যদল বিংগ বেংগ থিয়েটাৰ ফাউণ্ডেশ্যনৰ শিল্পীসকলে বিবেক উপাধ্যায়ৰ দ্বাৰা পৰিচালিত তথা মুদ্ৰা ৰাক্ষসৰ ৰচনাৱলী হিন্দী নাটক ‘আল আফচাৰ’ মঞ্চস্থ কৰিব বুলি উদ্যোক্তা মণ্ডলীয়ে জানিবলৈ দিয়ে।

এই সংবাদমেলত ভাৰতমুনি নাট্য সমাৰোহৰ আয়োজক কমিটিৰ সভাপতি জীতেন শৰ্মাৰ লগতে সংস্কাৰ ভাৰতীৰ ক্ষেত্ৰ প্ৰমুখ ড০ ধনঞ্জয় কুশৰে, কাৰ্যকৰ্তা ৰাজীৱ দত্তকে ধৰি অন্যান্য বহুকেইজন কৰ্মকৰ্তা উপস্থিত থাকে।