ৰণনীতিৰ সন্ধান : শুকুৰবাৰৰ পৰা নলবাৰীত বিজেপিৰ ৰাজ্যিক কাৰ্যনিৰ্বাহক

ভাৰতীয় জনতা পাৰ্টি, অসমৰ ৰাজ্যিক কাৰ্যনিৰ্বাহক সভা অহা ১৮, ১৯ মে’ত দুদিনীয়াকৈ নলবাৰীৰ চৰকাৰী গৰ্ডন উচ্চতৰ মাধ্যমিক বিদ্যালয় খেলপথাৰত অনুষ্ঠিত হ’ব। বিজেপিৰ ৰাজ্যিক কাৰ্যনিৰ্বাহকক লৈ নলবাৰী জিলা বিজেপিয়ে ইতিমধ্যে প্ৰস্তুতি সম্পূৰ্ণ কৰি তুলিছে।

ইতিমধ্যে, ৰাজ্যিক কাৰ্যনিৰ্বাহক সভাক লৈ গৰ্ডন খেলপথাৰখনত মূল সভাগৃহ সজোৱাৰ লগতে জিৰণি কোঠা আৰু ৰান্ধনী ঘৰৰো ব্যৱস্থা কৰা হৈছে। পল্লা পথ আৰু গৰ্ডনৰ পথছোৱাত দলীয় পতাকা আঁৰি দিয়াৰ লগতে বৃহৎ বৃহৎ তোৰণ সজোৱা হৈছে।

ৰাজ্যিক কাৰ্যনিৰ্বাহক সভা অনুষ্ঠিত হ’ব লগা মূল সভাগৃহটো আটকধুনীয়াকৈ সজাই তোলাৰ লগতে শীত-তাপ নিয়ন্ত্ৰণৰ ব্যৱস্থাও গ্ৰহণ কৰা হৈছে।

বিজেপিৰ জিলা সভাপতি বনদীপ ডেকাই জনোৱা মতে, ১৯ মে’ৰ বিয়লি ৪ বজাত সামৰণি পৰিব ৰাজ্যিক কাৰ্যনিৰ্বাহক সভা। এই সভালৈ মুখ্যমন্ত্ৰী, অসম চৰকাৰৰ মন্ত্ৰীসকল আৰু ৰাষ্ট্ৰীয় পৰ্যায়ৰ নেতাৰ আগমনৰ প্ৰতি লক্ষ্য ৰাখি জিলা প্ৰশাসন আৰু আৰক্ষী প্ৰশাসনে নিৰাপত্তামূলক ব্যৱস্থা কৰা বুলিও জিলা সভাপতিয়ে জানিবলৈ দিছে।

জানিব পৰা মতে, ১৮ মে’ৰ বিয়লি ২ বজাত আৰম্ভ হ’ব ৰাজ্যিক কাৰ্যনিৰ্বাহক সভা। নলবাৰীৰ বিধায়ত অশোক শৰ্মাই জনোৱা মতে, এই কাৰ্যনিৰ্বাহক সভাত অসমৰ বিভিন্ন জিলাৰ পৰা ৪৫০ গৰাকী প্ৰতিনিধিয়ে যোগদান কৰিব। তদুপৰি মুখ্যমন্ত্ৰী সৰ্বানন্দ সোণোৱালকে ধৰি তেওঁৰ মন্ত্ৰী পৰিষদসহ ৬১জন দলীয় বিধায়কে এই সভাত অংশ ল’ব।

বৰ্তমান ৰাজ্যখনত চলি থকা প্ৰতিবাদমুখৰ পৰিস্থিতিৰ প্ৰতি লক্ষ্য ৰাখি পৰিস্থিতিৰ মোকাবিলা কৰিবলৈ এই কাৰ্য নিৰ্বাহকত ৰণনীতি প্ৰস্তুত কৰাৰ সম্ভাৱনা আছে বুলি এক সূত্ৰই জানিব দিছে। বিজেপিৰ শীৰ্ষ নেতাৰ উপস্থিতিত অনুষ্ঠিত হ’বলগীয়া কাৰ্যনিৰ্বাহকত আগন্তুক নিৰ্বাচনৰ বাবে দলীয় ৰণ কৌশল সম্পৰ্কে আলোচনা কৰাৰ সম্ভৱনাও আছে বুলি সূত্ৰটোৱে জনায়।

ৰাজ্যিক কাৰ্যনিৰ্বাহকত অংশ ল’ব লগা ৪৫০জন প্ৰতিনিধিক নিশাটো কটাবৰ বাবে হোটেল, লজৰ পৰিৱৰ্তে কাৰ্যকৰ্তা, শুভাকাংক্ষী আৰু বিশিষ্ট নাগৰিকৰ ঘৰে ঘৰে ৰখা হ’ব বুলি বিধায়ক অশোক শৰ্মাই জানিবলৈ দিছে।