চিবিআইৰ জিম্মাৰ পৰাই হেৰাল ১০৩ কেজি সোণ! আদালতে দিলে চিআইডি তদন্তৰ নিৰ্দেশ

ইতিহাসত এইটো প্ৰথম এনেধৰণৰ ঘটনা। কেন্দ্ৰীয় তদন্তকাৰী সংস্থা চিবিআইৰ বাবে হয়তো ইয়াতকৈ আৰু ডাঙৰ লজ্জাজনক ঘটনা হ’ব নোৱাৰে।

চিবিআইৰ জিম্মাৰ পৰাই তেওঁলোকে বাজেয়াপ্ত কৰা ১ কুইন্টলতকৈয়ো অধিক পৰিমানৰ সোণ হেৰাইছে। এই সোণৰ বজাৰ মূল্য হ’ব প্ৰায় ৪৩ৰ পৰা ৪৫ কোটি টকা।

মাদ্ৰাজ হাইকোৰ্টে কেন্দ্ৰীয় তদন্তকাৰী সংস্থাটোৰ বিৰুদ্ধে চিআইডি তদন্তৰ নিৰ্দেশ দিছে। চিবিআইৰ বাবে এয়া সঁচাকৈয়ে এক অস্বস্তিকৰ ঘটনা।

বাতৰি অনুসৰি, ২০১২চনত ছুৰানা কৰ্পোৰেশ্যন নামৰ চেন্নাইৰ এটা সংস্থাৰ পৰা এই সোণ চিবিআয়ে বাজেয়াপ্ত কৰিছিল। সোণ-ৰূপৰ আমদানি কৰা সংস্থাটোৰ বিৰুদ্ধে ৮বছৰ পূৰ্বে উত্থাপিত নিয়ম বহিৰ্ভূত আমদানিৰ অভিযোগত মুঠ ৪০০কেজি সোণ চিবিআইয়ে বাজেয়াপ্ত কৰিছিল।

সংস্থাটোৰ ভল্টত ৰখা সেই সোণ নিৰাপদে থকাৰ কথা জনাইছিল সংস্থাটোৱে। যিবোৰ ভল্টত সেইবোৰ ৰখা হৈছিল তাৰ চাবি চেন্নাইৰ চিবিআইৰ এখন বিশেষ আদালতত জমা দিয়া হৈছিল।

অৱশ্যে, চিবিআইয়ে সেই চাবি আদালতখনত কেতিয়া জমা দিছিল সেয়া জনাব পৰা নাই।

যোৱা বছৰত উক্ত সোণক লৈ বহু গোচৰ চলিছিল যদিও সেই সোণখিনি ঠিকেই আছেনে নাই সেইটো ফহিয়াই চোৱাৰ কোনো প্ৰয়োজনবোধ কৰা নাছিল।

যোৱা বছৰ ডিচেম্বৰত নেস্যনেল কোম্পানী ল ট্ৰিবিউনেলে সেই সোণ ছুৰানা কৰ্পোৰেশ্যনৰ ঋণ পৰিশোধ কৰাৰ বাবে এছবিআইকে ধৰি ছয়টা বেংকৰ মাজত ভাগ কৰি দিয়াৰ পৰামৰ্শ দিয়ে।

চিবিআইৰ বিষয়াসকলে সেই বেংকসমূহৰ বিষয়াসকলৰ সন্মুখত সোণখিনি মুকলি কৰিবলৈ গৈয়েই হতবাক হৈ পৰে। দেখা যায় যে প্ৰায় ১০৩ কেজি সোণ কম ওলাইছে।

আদালতত এই ঘটনাৰ তদন্তৰ দাবীত গোচৰ দাখিল কৰা হয়। আদালতত চিবিআইৰ অধিবক্তাই যুক্তি দৰ্শাই যে সেই সোণসমূহ বাজেয়াপ্ত কৰাৰ সময়ত একেলগে জোখা হৈছিল। পাছত সেইবোৰ বেলেগে জোখা হয়। হয়তো এই সময়ত এই সোণৰ ওজন কোনোধৰণে কমি গৈছে।

চিবিআইৰ এই হাস্যকৰ যুক্তি মানি ল’ব নোৱাৰিলে আদালতে। ন্যায়াধীশে স্পষ্ট কৰি জনাই দিয়ে যে সোণ ভাং নহয় যে সেয়া উৰি যাব।

শুকুৰবাৰে মাদ্ৰাজ হাইকোৰ্টে এই সোণ হেৰুওৱাৰ তদন্তৰ দায়িত্ব চিবি-চিআইডিক অৰ্পণ কৰে। চিবিআইয়ে চিআইডিৰ তদন্তত আপত্তি দৰ্শাই আন কোনো কেন্দ্ৰীয় সংস্থাৰ দ্বাৰা তদন্তৰ দাবী কৰে যদিও আদালতে সেয়া নাকচ কৰে।