বিশিষ্ট সাহিত্যিক আনন্দ বৰমুদৈলৈ ‘যতীন্দ্ৰ কুমাৰ বৰগোহাঞি স্মাৰক’ বঁটা
২৮ ফেব্ৰুৱাৰি অর্থাৎ কাইলৈ বিশিষ্ট সাহিত্যিক ড০ আনন্দ বৰমুদৈক প্ৰদান কৰা হ’ব ‘যতীন্দ্ৰ কুমাৰ বৰগোহাঞি স্মাৰক সমালোচনামূলক সাহিত্য-সাংবাদিকতা বটাঁ-২০১৭’।
এই উপলক্ষে কাইলৈ দিনৰ ১১ বজাত গুৱাহাটী শ্ৰীমন্ত শংকৰদেৱ কলাক্ষেত্ৰৰ সংগ্ৰহালয় প্ৰেক্ষাগৃহত মুখ্যমন্ত্ৰী সৰ্বানন্দ সোণোৱালে বিশিষ্ট সাহিত্যিকগৰাকীক বঁটা প্ৰদান কৰিব।
আনহাতে একেটা অনুষ্ঠানতে বিগত সময়ছোৱাত অসমৰ ভাষা-সহিত্য-সংস্কৃতি আৰু সাংবাদিকতাৰ ক্ষেত্ৰলৈ আগবঢ়োৱা অৱদানৰ স্বীকৃতিস্বৰূপে ‘জা’ই এইবাৰ বিশিষ্ট সাংবাদিক হাইদৰ হুছেইন আৰু ‘দৈনিক অগ্ৰদূত’ কাকতৰ মুখ্য সম্পাদক কনকসেন ডেকা, পূৰ্বাঞ্চল প্ৰহৰীৰ মুখ্য সম্পাদক জি এল আগৰৱালাক তৰফৰপৰা সম্বৰ্দ্ধনা জনাব।
অনুষ্ঠানটোৰ লগত সংগতি ৰাখিয়েই সংবাদ মাধ্যমৰ স্বাধীনতা আৰু অন্যান্য কেইবাটাও বিষয়ক সামৰি এখন সাংবাদিক কৰ্মশালাৰো আয়োজন কৰা হৈছে।
বটাঁ প্ৰদান অনুষ্ঠান আৰু সাংবাদিক কৰ্মশালাৰ লগত সংগতি ৰাখি ‘জা বাৰ্তা’ নামৰ এখন হিন্দী-ইংৰাজী-অসমীয়া ত্ৰি-ভাষিক স্মৰণিকা প্ৰকাশৰ ব্যৱস্থা কৰা হৈছে।
বটাঁ প্ৰদান অনুষ্ঠানত মুখ্যমন্ত্ৰীৰ মিডিয়া উপদেষ্টা হৃষীকেশ গোস্বামী, জনসংযোগ বিভাগৰ সঞ্চালক ৰাজীৱ প্ৰকাশ বৰুৱা, প্ৰেছ কাউন্সিল অৱ ইণ্ডিয়াৰ সদস্য তথা আনন্দ বজাৰ পত্ৰিকাৰ সহঃ সম্পাদক প্ৰজ্ঞানন্দ চৌধুৰী, এন ইউ জে (আই)ৰ অধ্যক্ষ তথা নই দুনিয়া আৰু হিন্দুস্তান সমাচাৰৰ প্ৰাক্তন কাৰ্যবাহী সম্পাদক, জেষ্ঠ সাংবাদিক ৰাজবিহাৰী, এন ইউ জে (আই)ৰ সম্পাদকপ্ৰধান প্ৰথিতযশা সাংবাদিক ৰতন দীক্ষিত, ৰাষ্ট্ৰীয় হিন্দী দৈনিক ‘ৰাষ্ট্ৰীয় খবৰ’ৰ সম্পাদক ৰজত কুমাৰ গুপ্তা প্ৰমুখ্যে বহুকেইজন জ্যেষ্ঠ সাংবাদিক-বুদ্ধিজীৱীয়ে অংশগ্ৰহণ কৰিব বুলি জানিব পৰা গৈছে।