নাগালেণ্ডৰ পেৰেনত ৩জন লোকক গুলীয়াই হত্যা দুৰ্বৃত্তৰ; জ্বলাই দিলে বাহন, কেইবাটাও বাসগৃহ

নাগালেণ্ডৰ পেৰেন জিলাৰ লামহাইনামদী গাঁৱত সোমবাৰে সন্ধিয়া অজ্ঞাত দুৰ্বৃত্তই ৩জন লোকক গুলীয়াই হত্যা কৰাৰ ঘটনা সংঘটিত হৈছে।

বাতৰি অনুসৰি, ৰাজ্যখনৰ পেৰেন জিলাৰ লামহাইনামদী গাঁৱৰ নিজৰ মাটিত কাম কৰি থকাৰ সময়তে দুৰ্বৃত্তই লোক তিনিজনক গুলীয়াই হত্যা কৰে।

স্থানীয় লোকে পিছত এখন অগ্নিদগ্ধ বাহনৰ সৈতে লোক তিনিজনৰ মৃতদেহ  উদ্ধাৰ কৰে। বাহনখন তেওঁলোকৰে আছিল বুলি কোৱা হৈছে আৰু গাঁৱখনৰ কেইবাটা বাসগৃহও জ্বলাই দিয়া হৈছে।

এতিয়ালৈকে পেৰেন আৰক্ষীয়ে কোনো তথ্য প্ৰকাশ কৰা নাই আৰু নিহত ব্যক্তি কেইজনক চিনাক্ত কৰিব পৰা হোৱা নাই।

পেৰেন জিলাৰ চিভিল ছচাইটি অৰ্গেনাজেশ্যনে এই ঘটনাৰ প্ৰতিবাদত আজু বন্ধ ঘোষণা কৰিছে। বন্ধৰ সময়ছোৱাত পেৰেন জিলাৰ সকলো ব্যৱসায়িক প্ৰতিষ্ঠান, বিদ্যালয় তথা কাৰ্যালয় আদি বন্ধ হৈ পৰিছে।

মঙলবাৰে মৃত লোককেইজনৰ অন্তিম সৎকাৰৰ বাবে লামহাইনামদী গাঁৱলৈ যোৱাৰ সময়ত জালুকীত বহু লোকৰ সমাৱেশ ঘটে।

দুৰ্বৃত্তক বিচাৰি অভিযান চলাই থকা হৈছে বুলি জানিবলৈ দিছে আৰক্ষীয়ে।