নাগৰিকত্ব সংশোধনী বিধেয়ক বাতিল কৰাৰ দায়িত্ব ল’ব লাগিব মুখ্য মন্ত্ৰী সোণোৱালে : পলাশ চাংমাই
নাগৰিকত্ব সংশোধনী বিধেয়ক ২০১৬’ বাতিলৰ দাবীত গুৱাহাটীত আজি ৭০ টা জনগোষ্ঠীয় সংগঠনে প্ৰতিবাদ সাৱ্যস্ত কৰিছে। সংগঠনকেইটাই গুৱাহাটীৰ মেঘদূত ভৱনৰ সন্মুখত এক অৱস্থান ধৰ্মঘট কাৰ্য্যসূচীৰ জৰিয়তে এই প্ৰতিবাদ সাব্যস্ত কৰিছে।
প্ৰতিবাদকাৰীসকলে প্ৰতিবাদস্থলীৰ পৰাই নাগৰিকত্ব সংশোধনী বিধেয়ক ২০১৬’ চৰকাৰে বাতিল কৰিবই লাগিব বুলি দাবী জনায়।
উল্লেখ্য যে, মুখ্যমন্ত্ৰী সৰ্বানন্দ সোণোৱালে সোমবাৰে শিৱসাগৰৰ নিৰ্বাচনী প্ৰচাৰত কিছু জাতীয় সংগঠনে জনসাধাৰণক বিপথে পৰিচালনা কৰিবলৈ আন্দোলন কৰিছে তথা এই আন্দোলন ভিত্তিহীন বুলি মন্তব্য কৰিছিল।
ইয়াৰ পাছতেই এই মন্তব্যৰ তীব্ৰ বিৰোধিতা কৰি প্ৰতিবাদত অংশগ্ৰহণ কৰা জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমাইয়ে সোণোৱালক আজি কটাক্ষ কৰে ।
পলাশ চাংমাইয়ে কয়, “নাগৰিকত্ব সংশোধনী বিধেয়ক ২০১৬’ বাতিল কৰাৰ দায়িত্ব মুখ্য মন্ত্ৰী সৰ্বানন্দ সোণোৱালে ল’ব লাগিব, তেতিয়াহে এই ৭০ টা সংগঠনে এই আন্দোলন বন্ধ কৰিব।”
তেওঁ লগতে সোণোৱালক বিধান সভাত নাগৰিকত্ব সংশোধনী বিধেয়কৰ বিৰুদ্ধে প্ৰস্তাব ল’বৰ বাবে আহ্বান জনায়।
“আৰ এছ এছ আৰু দিল্লীক সন্তুষ্ট কৰিবৰ বাবে সৰ্বানন্দ সোণোৱালে জাতিটোক বিক্ৰী কৰিব বিচৰা কথাটো অতিশয় দুৰ্ভাগ্যজনক,”- লগতে চাংমাইয়ে এইদৰে কয়।
আনহাতে, উক্ত প্ৰতিবাদত অংশগ্ৰহণ কৰি অসমীয়া যুৱ মঞ্চৰ কামৰূপ জিলাৰ সভাপতি নোমল বৰাই সোণোৱালক’ নিমাতী কন্যা আখ্যা দিয়াৰ লগতে কয়,”অসমৰ ৰাইজে আপোনাক ৰজা পাতিছিল, কিন্তু এতিয়া আপুনি অসমীয়াক আঘাত হনাৰ বাবে উঠি পৰি লাগিছে।”
প্ৰতিবাদকাৰীসকলে “বিজেপি নিপাত যাওঁক”, ‘’আৰ এছ এছ মুৰ্দাবাদ”, ‘’কেন্দ্ৰীয় চৰকাৰ হুচিয়াৰ’’, ইত্যাদি ধ্বনিৰে মেঘদূত ভৱনৰ সন্মুখভাগ উত্তাল কৰি তোলে।
ইপিনে, আজিৰ এই প্ৰতিবাদৰ অন্তত প্ৰতিবাদকাৰী ৭০ টা জাতীয় সংগঠনে মুখ্য মন্ত্ৰীলৈ এখন স্মাৰক পত্ৰ প্ৰদান কৰিব।