কৰ’নাৰ সংহাৰ: কেনে আছে বাংলাদেশ? আমেৰিকাত ক’ৰনাত মৃত্যু ৭৬জন বাংলাদেশীৰ

সমগ্ৰ বিশ্বতে কৰ’না ভাইৰাছৰ সংক্ৰমণে সৃষ্টি কৰা আতংকৰ মাজতে ভাৰতৰ চুবুৰীয়া ৰাষ্ট্ৰ বাংলাদেশত কৰ’নাই এতিয়াও বিধ্বংসী ৰূপ লোৱা নাই।

বাংলাদেশত এতিয়ালৈকে ১৩ জন লোকে কৰ’না ভাইৰাছত আক্ৰান্ত হৈ মৃত্যুমুখত পৰিছে। অৱশ্যে, এতিয়াও এই মহামাৰীৰ পৰা বিপদমুক্ত বুলি ক’ব নোৱাৰি দেশখনক।

দেশখনত কৰ’নাৰ সংহাৰ সীমিত হৈ থাকিলেও আমেৰিকাত বাস কৰা বাংলাদেশী নাগৰিকৰ সংখ্যা বৃদ্ধি পাইছে।

আমেৰিকাৰ স্থানীয় সময় অনুসৰি ৫ এপ্ৰিলৰ মাজনিশালৈকে কৰ’না বাইৰাছত আক্ৰান্ত হৈ ৭৬জন বাংলাদেশী নাগৰিকৰ মৃত্যু হৈছে।

তদুপৰি, প্ৰবাসী বাংলাদেশীৰ ভিতৰৰ কেইবাশও লোক এই ভাইৰাছৰ দ্বাৰা আক্ৰান্ত হোৱাৰ খৱৰ পোৱা গৈছে।

বাংলাদেশৰ বিদেশ মন্ত্ৰ্যালয়ৰ সূত্ৰ অনুসৰি আমেৰিকাত কৰ’না ভাইৰাছত আক্ৰান্ত হৈ ৭৬জন লোকে প্ৰাণ হেৰুৱাইছে। ইয়াৰ ভিতৰত এগৰাকী প্ৰাক্তন সংসদ সদস্য মহম্মদ ছিৰাজুল ইছলামো আছে।

জানিব পৰা মতে, কৰ’না ভাইৰাছৰ সংক্ৰমণৰ ফলত মৃত্যু হোৱা বাংলাদেশীসকলৰ বেছিভাগেই আছিল নিউয়ৰ্কৰ বাসিন্দা।

ইপিনে, নিউয়ৰ্কত মৃত্যু হোৱা লোকসকলৰ আত্মীয় তথা সংম্পৰ্ক ৰখা লোকো কৰ’না ভাইৰাছৰ দ্বাৰা সংক্ৰমিত হৈছে।

আক্ৰান্ত লোকসকলৰ ভিতৰত চিকিৎসক, আৰক্ষী আদিকে ধৰি বিভিন্ন বৃত্তিত জড়িত লোক আছে।

বৰ্তমান বাংলাদেশত সংক্ৰমণৰ হাৰ দ্ৰুত গতিত বৃদ্ধি পোৱা নাই যদিও সময় যোৱাৰ লগে লগে আৰু অধিক পৰীক্ষাৰ পাছতহে সঠিক ছবিখন পোহৰলৈ আহিব বুলি অনুমান কৰা হৈছে।