অনুপস্থিতিৰ অভিযোগ! পঞ্চম শ্ৰেণীৰ ছাত্ৰক পাইপেৰে প্ৰহাৰ অধ্যক্ষৰ

বিদ্যালয়ৰ অধ্যক্ষৰ বিৰুদ্ধে পঞ্চম শ্ৰেণীৰ ছাত্ৰ এজনক পিভিচি পাইপেৰে প্ৰহাৰ কৰাৰ অভিযোগ উত্থাপন হৈছে। বেংগালুৰুৰ এখন বিদ্যালয়ত ঘটা এই ঘটনাই অঞ্চলটোত এক আলোড়নৰ সৃষ্টি কৰিছে। তদুপৰি বিদ্যালয়খনৰ আন এগৰাকী শিক্ষকে পুত্ৰক হাৰাশাস্তি কৰাৰ অভিযোগ উত্থাপন কৰিছে ছাত্ৰগৰাকীৰ মাতৃয়ে। ইতিমধ্যে ঘটনা সন্দৰ্ভত তদন্ত আৰম্ভ হৈছে।

যোৱা ১৪ অক্টোবৰত বেংগালুৰুৰ মাগৰী ৰোডৰ এখন বিদ্যালয়ত পঢ়া ৯ বছৰীয়া পুত্ৰক বিদ্যালয়ত আবদ্ধ কৰি প্ৰহাৰ কৰাৰ অভিযোগ উত্থাপন কৰিছে ছাত্ৰগৰাকীৰ মাতৃ দিব্যাই।এই ঘটনাৰ অভিযুক্ত হৈছে বিদ্যালয়খনৰ অধ্যক্ষ ৰাকেশ কুমাৰ আৰু শিক্ষয়িত্ৰী চন্দ্ৰিকা। দিব্যাই অভিযোগ কৰিছে যে ঘটনাৰ দিনটোত পুত্ৰই স্কুললৈ যোৱাৰ পিছত খালী শ্ৰেণীকোঠাত আবদ্ধ কৰি ৰাখিছিল। তাৰ পাছত ৰাকেশ আৰু চন্দ্ৰিকাই পঞ্চম শ্ৰেণীৰ ছাত্ৰগৰাকীক হাৰাশাস্তি কৰে। দুপৰীয়ালৈকে তেওঁক তলাবন্ধ কৰি ৰখা হৈছিল। আনকি ৰাকেশে ছাত্ৰজনক পিভিচি পাইপেৰে প্ৰহাৰ কৰাৰ অভিযোগ উঠিছে।

ছাত্ৰীগৰাকীৰ মাতৃয়ে অভিযোগ দিয়াৰ পিছতে আৰক্ষীয়ে অধ্যক্ষ ৰাকেশ কুমাৰক গ্ৰেপ্তাৰ কৰে। জেৰাৰ সময়ত তেঁও ছাত্ৰজনক প্ৰহাৰ কৰাৰ কথাও স্বীকাৰ কৰে। ৰাকেশে কয় যে বিদ্যালয়ত ছাত্ৰজনৰ উপস্থিতিৰ হাৰ কম। সেইবাবেই তেওঁক ‘শাস্তি’ দিয়া হৈছিল যাতে তেওঁ ভৱিষ্যতে এনে কাম নকৰে। অৱশ্যে পঞ্চম শ্ৰেণীৰ ছাত্ৰ এজনক কিয় ইমান কঠোৰ শাস্তি দিয়া হ’ল তাৰ কোনো উত্তৰ পোৱা নগ’ল। জানিব পৰা মতে অভিযুক্ত অধ্যক্ষগৰাকীক জামিনত মুকলি কৰি দিয়া হৈছে।