মহানগৰীৰ খানাপাৰাত কাইলৈৰ পৰা ১০দিনীয়াকৈ “আদি মহোৎসৱ” : আদিবাসীসকলৰ জীৱনধাৰাক তুলি ধৰাৰ লক্ষ্য

উত্তৰ পূৰ্বাঞ্চলৰ আদিবাসী জনজাতীয় লোকসকলৰ জীৱনৰ মান উন্নত কৰাক লক্ষ্য হিচাপে লৈ মহানগৰীৰ গণেশ মন্দিৰ ইণ্ড’ৰ ষ্টেডিয়ামত ষষ্ঠ আদি মহোৎসৱ অনুষ্ঠিত কৰা হৈছে। কাইলৈৰ পৰা ২৫ ফেব্ৰুৱাৰিলৈকে ১০ দিনীয়া কাৰ্য্যসূচীৰে ‘ট্ৰাইফেড’ৰ উদ্যোগত ‘আদি মহোৎসৱ’ নামেৰে এই মহোৎসৱ অনুষ্ঠিত হ’ব। আজি এক সংবাদমেল যোগে ট্ৰাইফেডৰ মুখ্য সঞ্চালক প্ৰবীৰ কৃষ্ণই এই কথা জানিবলৈ দিয়ে। তেওঁ কয় ”আদিবাসী জনজাতীয় লোকসকলৰ কাৰু-শিল্প, সংস্কৃতি, ৰন্ধনপ্ৰণালী, ব্যৱসায়-বাণিজ্যক এটা নতুন মাত্ৰা দিয়াৰ উদ্দেশ্যে এই মহোৎসৱ আয়োজন কৰা হৈছে।”

তদুপৰি বনত উৎপন্ন হোৱা সামগ্ৰীসমূহ সংগ্ৰহ কৰি আদিবাসী লোকসকলে যাতে তাৰ পৰা উন্নতমানৰ সামগ্ৰী নিৰ্মাণ কৰিব পাৰে তাৰ প্ৰতিও এই মহোৎসৱত লক্ষ ৰখা হৈছে বুলি আয়োজক কমিটিয়ে জানিবলৈ দিয়ে। ৰাজ্য চৰকাৰৰ সৈতে এই সন্দৰ্ভত এক আলোচনাত মিলিত হ’ব বুলি প্ৰবীৰ কৃষ্ণাই জানিবলৈ দিয়ে।

এই ক্ষেত্ৰত অসম চৰকাৰৰ ভৈয়াম জনজাতি আৰু পিছপৰা শ্ৰেণীৰ কল্যাণ সঞ্চালকালয় আৰু ভৈয়াম জনজাতি উন্নয়ন নিগমৰ অসম চৰকাৰে দ্বায়িত্ব প্ৰদান কৰিছে বুলি তেওঁ সদৰী কৰে।

তাৎপৰ্য্যপূৰ্ণভাৱে ট্ৰাইফেডৰ সঞ্চালকজনে মন্তব্য কৰি কয় “আমি আদিবাসী কাৰুশিল্পী সকলক শিকোৱাৰ প্ৰয়োজন নাই, বৰঞ্চ তেওঁলোকৰ পৰা আমি তেখেতসকলে কেনেদৰে অতি কষ্ট স্বীকাৰ কৰি নিজ হাতেৰে প্ৰকৃতিত সহজলভ্য সামগ্ৰীৰ পৰা উন্নতমানৰ সামগ্ৰীৰ প্ৰস্তুত কৰে, সেই জ্ঞান আহৰণ কৰা উচিত।”

১০ দিনীয়াকৈ হ’বলগীয়া এই মহোৎসৱত প্ৰত্যেকদিনাই উত্তৰ-পূৰ্বাঞ্চলৰ আদিবাসী লোকসকলৰ দ্বাৰা সাংস্কৃতিক অনুষ্ঠান পৰিবেশিত হ’ব বুলি আয়োজক কমিটিয়ে জানিবলৈ দিয়ে।

এই মহোৎসৱত উত্তৰ-পূৰ্বাঞ্চলৰ আটাইকেইখন ৰাজ্যৰ উপৰি ছত্তিশগড়, মধ্যপ্ৰদেশ,  উৰিষ্যা, হিমাচল প্ৰদেশ, গুজৰাট, ৰাজস্থান, অন্ধ্ৰপ্ৰদেশকে ধৰি মুঠ ২০খন ৰাজ্যৰ কলা-কুশলীসকলে তেওঁলোকৰ শিল্প প্ৰদৰ্শন কৰিব।

বিপণিসমূহত নানা ৰকমৰ হস্তনিৰ্মিত বস্ত্ৰ, নৃ-গোষ্ঠীয় গহনা, চীনা মাটিৰ পাত্ৰ, পেইণ্টিঙৰ লগতে আদিবাসী পৰম্পৰাগত খাদ্য পোৱা যাব বুলি জানিব পৰা গৈছে।

https://youtu.be/-16fdOCXDXY