ক’ৰনা ভাইৰাছৰ সংক্ৰমনৰ হাত সাৰিবলৈ টীয়কৰ সতর্কতামূলক ব্যৱস্থা গ্ৰহণ

ক’ৰনা ভাইৰাছৰ সংক্ৰমনৰ হাত সাৰিবলৈ যোৰহাট জিলাৰ টীয়কৰ  ভগামুখ আদৰ্শ চিকিৎসালয়ত স্থাপন কৰা JAIL CUM QUARANTINE CENTRE ত বৰ্হি:ৰাজ্যৰ  ৪ জন ব্যক্তিক  কালি বিয়লি ১৪ দিনৰ পয্যবেক্ষনৰ বাবে ভৰ্তী কৰা হৈছে।

এই সম্পৰ্কত কালি  টীয়কৰ প্ৰশাসনৰ হৈ ৰাজহ চক্ৰ বিষয়া আকাশী দুৱৰাই জানিবলৈ দিয়ে যে অসমত কৰ্মৰত উত্তৰ প্ৰদেশৰ ৪ জন ব্যক্তিক প্ৰাথমিক পৰ্যবেক্ষণৰ বাবে  টীয়কৰ  ভগামুখ আদৰ্শ চিকিৎসালয়ত স্থাপন কৰা JAIL CUM QUARANTINE CENTRE ত ৰখা হৈছে।

উল্লেখ্য যে  টীয়ক অঞ্চলত এই পৰ্যন্ত  ক’ৰনাৰ ভাইৰাছত আক্ৰান্ত কোনো সন্দেহজনক তথ্য লাভ কৰা হোৱা নাই বুলি টীয়কৰ প্ৰশাসনৰ সূত্ৰে জানিবলৈ দিছে।

যিসকল বহিঃৰাজ্যত কৰ্মৰত ব্যক্তি নিজ নিজ ঘৰলৈ উভতি আহিছে তেওঁলোকক প্ৰাথমিক পয্যায়ত স্থানীয় আশা কৰ্মী সকলৰ দ্বাৰা  চিনাক্ত কৰি ১৪ দিনলৈকে নিজ নিজ  ঘৰত থাকিবলৈ পৰামৰ্শ দিয়া হৈছে।

আনহাতে পৰহি সন্ধিয়াৰ পৰা ঘোষণা কৰা ল’কআউটৰ সম্পূৰ্ণ প্ৰভাৱ বৃহত্তৰ টীয়ক অঞ্চলত পৰা দেখা গৈছে। অত্যাৱশ্যকীয় সেৱাসমূহৰ বাহিৰে বাকী সকলো প্ৰতিষ্ঠান, গাড়ী মটৰৰ চলাচল সম্পূৰ্ণ বন্ধ আছে।