১১১জন ব্যক্তিৰ সংস্পৰ্শলৈ আহিছিল গুৱাহাটীৰ COVID-19ত আক্ৰান্ত লোকজন

১১১ জন লোকৰ সংস্পৰ্শলৈ আহিছিল COVID-19ত আক্ৰান্ত গুৱাহাটীৰ স্পেনিছ গাৰ্ডেনত বাস কৰা ব্যৱসায়ী মনিষ তিবেৰৱাল। স্বাস্থ্য মন্ত্ৰী হিমন্ত বিশ্ব শৰ্মাই আজি সংবাদমেলত এই কথা জানিবলৈ দিয়ে।

মন্ত্ৰী শৰ্মাই জনোৱা মতে ৪৫ বছৰীয়া মনিষৰ পৰিয়ালে তেওঁ সংস্পৰ্শলৈ অহা লোকৰ তথ্য যোগান ধৰি স্বাস্থ্য বিভাগক সহায় সহযোগিতা কৰি আহিছে। মনিষৰ পত্নীয়ে নিশা পৰ্যন্ত স্বাস্থ্য বিভাগৰ সৈতে ফোনত  যোগাযোগ কৰি সংস্পৰ্শলৈ অহা লোকৰ নাম জনাই আহিছে, তেওঁ কয়।

ইপিনে, সংবাদমেলত মন্ত্ৰীগৰাকীয়ে জনোৱা অনুসৰি বৰ্তমানলৈকে ৰাজ্যৰ ১৫২৯ গৰাকী ব্যক্তিৰ নমুনা  পৰীক্ষাৰ বাবে পঠোৱা হৈছে, তাৰে ২৫ জন পজিটিভ, ১৩০৮ জন নিগেটিভ আৰু ১৯৬ জনৰ ৰিজাল্ট পাবলৈ বাকী আছে।

১৫২৯ জনৰ ভিতৰত ৮১২ জন নিজামুদ্দিনৰ সৈতে জড়িত। উক্ত ৮১২ জনৰ ৬৩৬ জন নিগেটিভ, ২৪ জন পজিটিভ আৰু ১৪২ জনৰ ৰিজাল্ট পাবলৈ বাকী আছে।