সুৰাৰ বিপনী খোলাৰ লগে লগে মহানগৰীত সুৰাপায়ী গ্ৰাহকৰ ভিৰ

সোমবাৰৰ পৰা ৰাজ্যত খুলি দিয়া হৈছে সুৰাৰ বিপনীসমূহ। আবকাৰী বিভাগে পুৱা ১০ বজাৰ পৰা বিয়লি ৫ বজালৈকে খুলিবলৈ নিৰ্দেশ দিছে বিপনীসমূহ।

তাৰ বাবে বহু দিন ডিঙি তিয়াব নোৱাৰা সুৰাপায়ী গ্ৰাহকসকলে পাইছে যথেষ্ট সকাহ। সেয়েহে পুৱা ১০ বজাৰ লগে লগে মহানগৰীৰ ভিন্ন প্ৰান্তৰ সুৰাৰ বিপনীত দেখা পোৱা গৈছে গ্ৰাহকৰ ভিৰ।

কিছু সংখ্যকে সামাজিক ব্যৱধান মানি সুৰা ক্ৰয় কৰিবলৈ থিয় হৈছে যদিও বসুসংখ্যকে মানি চলা নাই সামাজিক ব্যৱধান। তেওঁলোকে ১ মিটাৰ দূৰত্ব বজাই নাৰাখি জুম বান্ধি সুৰা ক্ৰয় কৰা পৰিলক্ষিত হ’ল।

মহানগৰীৰ খ্ৰীষ্টানবস্তি, উলুবাৰী, পল্টনবজাৰ আৰু ABCৰ কেইখনমান সুৰাৰ বিপনীত গ্ৰাহকৰ মাজত সামাজিক দূৰত্ব দেখিবলৈ পোৱা নগ’ল। সুৰাৰ বিপনীৰ স্বত্ত্বাধিকাৰীয়েও তেওঁলোকক সামাজিক ব্যৱধান মানি চলিবলৈ কোৱা পৰিলক্ষিত নহ’ল।

তাৰ বিপৰীতে অন্য কিছুসংখ্যক বিপনীত সামাজিক দূৰত্ব বজাই ৰাখি সুৰা ক্ৰয় কৰিবলৈ কৰ্মচাৰীয়ে গ্ৰাহকক অনুৰোধ কৰা দেখা যায়। সামাজিক ব্যৱধান মানি নচলা সকলক শাৰী পাতি ১ মিটাৰ দূৰত্বত থিয় হ’বলৈ আহ্বান জনাইছে মহানগৰ আৰক্ষীয়ে।

মহানগৰীৰ গণেশগুৰি, খ্ৰীষ্টানবস্তি, এবিচি, ভঙাগড়, বেলতলা, পল্টনবজাৰ ইত্যাদি অঞ্চলৰ সুৰাৰ বিপনীত পুৱা ১০ বজাৰ পৰা সুৰাপায়ী লোকৰ ভিৰ পৰিলক্ষিত হয়।

সুৰাৰ বিপনী সমূহতো বিভাগীয় নীতি নিৰ্দেশনা মানি গ্ৰাহকক সুৰা ক্ৰয়ৰ পূৰ্বে যোগান ধৰিছে হেণ্ড চেনিটাইজাৰ।