নাগপুৰত সাংবাদিকৰ মাক, ওঠৰ মহীয়া কন্যাৰ হত্যা : দোষীক চিনাক্ত কৰি শাস্তিৰ দাবী জাৰ্নেলিস্ত ফ’ৰাম অৱ আচামৰ

নাগপুৰৰ অপৰাধ সাংবাদিক ৰৱিকান্ত কাম্বলে’ৰ মাক আৰু শিশু কন্যাক অচিনাক্ত দুৰ্বৃত্তই হত্যা কৰা ঘটনাত জাৰ্নেলিস্ত ফ’ৰাম অৱ আচামে আশ্চৰ্য্য প্ৰকাশ কৰিছে।

অসমৰ সাংবাদিক সংগঠনটোৱে দুৰ্বৃত্বক গ্ৰেপ্তাৰ কৰাৰ বাবে মহাৰাষ্ট্ৰ চৰকাৰক দাবী জনাইছে।

নাগপুৰৰ স্থানীয় সংবাদ মাধ্যমৰ বাতৰি অনুসৰি যোৱা ১৭ ফেব্ৰুৱাৰিত উষা কাম্বলে’ (৫৬ বছৰ) আৰু তেওঁৰ নাতি ৰাশি (১৮ মহীয়া)ৰ মৃতদেহ উদ্ধাৰ কৰা হৈছিল। তাৰ পূৰ্বে কেইঘণ্টামান তেওঁলোক নিৰুদ্দেশ হৈ আছিল আৰু দেওবাৰে ৰাতিপুৱা নাগপুৰৰ ওচৰৰ বাহাদুৰাৰ এটা পানী যুঁৱলিৰ পৰা তেওঁলোকৰ নিথৰ দেহ উদ্ধাৰ কৰা হৈছিল।

অসমৰ সাংবাদিক সংগঠনটোৰ সভাপতি ৰূপম বৰুৱা আৰু সম্পাদক নৱ ঠাকুৰীয়াই এক বিবৃতিযোগে কয়, ‘ৰৱিকান্তৰ মাক আৰু শিশুটিৰ হত্যাৰ আঁৰৰ উদ্দেশ্য উদ্ধাৰৰ বাবে ঘটনাটোৰ তদন্ত কৰিবলৈ আৰু আইন অনুসৰি দোষীক শাস্তি দিবলৈ আমি মহাৰাষ্ট্ৰ আৰক্ষীক দাবী জনাইছো।’