ক’ৰ’না ভাইৰাছৰ ফলত স্বাস্থ্য বিভাগৰ জ্যেষ্ঠ বিষয়াৰ মৃত্যু

ভাৰতে ক’ৰ’না ভাইৰাছৰ বিৰুদ্ধে যুঁজি থকাৰ সময়তে আজি পশ্চিমবংগৰ স্বাস্থ্য বিভাগৰ সহকাৰী সঞ্চালক ডাঃ বিপ্লৱ কান্তি দাসগুপ্তাৰ ক’ৰ’নাৰ ফলত মৃত্যু হয়।

কলকাতাৰ এখন ব্যক্তিগত চিকিৎসালয়ত মৃত্যু হোৱা বিষয়াগৰাকী ক’ৰ’নাত আক্ৰান্ত হৈ কিছু দিন পূৰ্বে চিকিৎসালয়ত ভৰ্তি হৈছিল। হঠাৎ শনিবাৰে নিশা বিষয়াগৰাকীৰ স্বাস্থ্যৰ অধিক অৱনতি ঘটে আৰু আজি পুৱা মৃত্যুবৰণ কৰে।

জানিব পৰা অনুসৰি, চিকিৎসাৰ সৈতে জৰিত কোনো লোকৰ মৃত্যু হোৱা পশ্চিম বংগত এইটো প্ৰথম ঘটনা। ডাঃ বিপ্লৱ কান্তিৰ পত্নীও বৰ্তমান ক’ৰ’নাত আক্ৰান্ত হৈ চিকিৎসাধীন হৈ আছে।

ই্‌ফালে উচ্চ পৰ্যায়ৰ বিষয়াগৰাকীৰ মৃত্যুত গভীৰ শোক প্ৰকাশ কৰিছে পশ্চিম বংগৰ মুখ্য মন্ত্ৰী মমতা বেনাৰ্জীয়ে।

উল্লেখ্য যে ভাৰতত এই পৰ্যন্ত ২৬৪৯৮ গৰাকী লোক ক’ৰ’নাত আক্ৰান্ত হৈছে। যোৱা ২৪ ঘণটাত ১৯৯০ গৰাকী নতুনকৈ আক্ৰান্ত হোৱাৰ লগতে ৪৯ গৰাকীয়ে মৃত্যুবৰণ কৰিছে।

ভাৰতত এতিয়ালৈকে ৮২৪ গৰাকী লোক ক’ৰ’নাৰ ফলত মৃত্যু হৈছে।