প্রাক্তন ডি এইছ ডি সন্তোষ হোজাইৰ হত্যাকাৰীক গ্ৰেপ্তাৰৰ দাবীত ৩৬ ঘন্টীয়া ডিমা হাচাও বন্ধ

ডিমাছা বিদ্ৰোহী গোট ডি এইছ ডিৰ প্ৰাক্তন সদস্য তথা ব্যৱসায়ী সন্তোষ হোজাইৰ হত্যাৰ ন্যায় বিচাৰি আজি পুৱা ৫ বজাৰ পৰা ঘোষণা কৰা ডিমা হাছাও জিলা বন্ধৰ সৰ্বাত্মক প্ৰভাৱ পৰিছে।

জিলাখনৰ হালালি প্ৰগ্ৰেসিভ ৱেলফেয়াৰ ছছাইটিয়ে এই বন্ধৰ আহ্বান জনাইছিল।

জিলা সদৰ হাফলঙত বেংক, প’ষ্ট অফিচ, পাৰ্বত্য স্বায়ত্ব শাসিত পৰিষদ সচিবালয়ৰ উপৰি চৰকাৰী বেচৰকাৰী প্ৰতিষ্ঠানসমূহ সম্পূৰ্ণভাৱে বন্ধ থকাৰ লগতে আৰক্ষী বা প্ৰশাসনৰ বাহিৰে কোনো ধৰণৰ যানবাহন চলাচল কৰা নাই।

হাফলংৰ উপৰি মাইবাং, হাৰাঙ্গাজাও, ডিয়ুংব্ৰা, লাংটিং, মাহুৰ, হাতিখালী, উমৰাংছু আদি ঠাইত বন্ধৰ সৰ্বাত্মক প্ৰভাৱ পৰিছে।

উল্লেখযোগ্য যে যোৱা ২৪ এপ্ৰিলত হাৰাঙ্গাজাওৰ নিজ গৃহৰ পৰা বন্দুকধাৰী দুৰ্বৃত্তৰ দলে সন্তোষ হোজাইক অপহৰণ কৰি লৈ গৈছিল।

যোৱা ৩০ এপ্ৰিলত লাংটিং আৰক্ষী থানাৰ অধীনৰ মুপা ৰিজাৰ্ভ ফৰেষ্টৰ ৰাষ্ট্ৰীয় ঘাইপথৰ দাঁতিৰ পৰা পুতি থোৱা অৱস্থাত আৰক্ষীয়ে তেওঁৰ মৃতদেহ উদ্ধাৰ কৰে।

আজি পৰ্যন্ত আৰক্ষীয়ে হত্যাকাৰীক গ্ৰেপ্তাৰ নকৰাত ডিএইচ্ছডিৰ প্ৰাক্তন মুৰব্বী দিলীপ নুনিচাই যোৱা ১১ মে’ত জিলা উপায়ুক্ত কাৰ্যালয়ৰ সম্মুখত মূপ খুৰাই প্ৰতিবাদ সাব্যস্ত কৰিছিল।

নুনিচাৰ অভিযোগ মতে এই অপহৰণ আৰু হত্যাৰ লগত ডিমা হাছাওৰ উপ আৰক্ষী অধীক্ষক সূৰ্যকান্ত মৰাঙৰ নাম সাঙোৰ খাইছে।

বিভিন্ন দল-সংগঠনে ইয়াৰ প্ৰতিবাদ জনাই সূৰ্যকান্ত মৰাঙক গ্ৰেপ্তাৰৰ দাবী জনাইছিল যদিও ডিমা হাছাও আৰক্ষীয়ে তেওঁক গ্ৰেপ্তাৰ কৰাৰ বিপৰীতে নিৰাপত্তাহে দিয়া বুলি নুনিচাৰ অভিযোগ।

লগতে পঢ়ক ডি এছ পি সূৰ্যকান্ত মৰাঙৰ গ্ৰেপ্তাৰৰ দাবীত দল-সংগঠনৰ তীব্ৰ প্ৰতিবাদ

এই সমগ্ৰ ঘটনাৰ এক উচিত তদন্তৰ দাবীত জিলা উপায়ুক্তৰ যোগেদি কেন্দ্ৰীয় গৃহমন্ত্ৰী অমিত শাহ আৰু মন্ত্ৰী হিমন্ত বিশ্ব শৰ্মা লৈ এখনকৈ স্মাৰকপত্ৰও প্ৰেৰণ কৰা হৈছে।

কাইলৈ অৰ্থাৎ ১৫ মে’ৰ আবেলি ৫ বজাৰ লৈকে এই বন্ধ কাৰ্যসূচী চলিব। এই পৰ্যন্ত বন্ধৰ ফলত জিলাখনৰ কোনো ঠাইৰ পৰা অপ্ৰীতিকৰ পৰিস্থিতিৰ খবৰ অহা নাই।