পাঁচদিন পূৰ্বেই দিল্লীত মৃত্যু হৈছিল কোভিড-১৯ত আক্ৰান্ত বোকাখাতৰ অজিত শইকীয়াৰ; মৰ্গত পৰি আছিল মৃতদেহ

দুই চৰকাৰৰ মাজত যোগাযোগৰ অভাৱত বিগত পাঁচটা দিন দিল্লীৰ চিকিৎসালয়ৰ মৰ্গতে পৰি আছিল কোভিড-১৯ত মৃত্যু হোৱা বোকাখাতৰ অজিত শইকীয়াৰ মৃতদেহ।

কালি অৰ্থাৎ শনিবাৰে পৰিয়ালৰ লোকে শইকীয়াৰ মৃত্যু খবৰ পাইছিল যদিও প্ৰকৃততে পাঁচ দিন পূৰ্বেই দিল্লীৰ লোক নায়ক চিকিৎসালয়ত অজিত শইকীয়াৰ মৃত্যু হৈছিল।

ইমানদিনে চিকিৎসালয়খনৰ মৰ্গতে পৰি আছিল তেওঁৰ মৃতদেহ।

শনিবাৰে দিল্লীৰ আসাম এছ’চিয়েচনৰ উদ্যোগতহে বোকাখাতৰ পৰিয়ালক অজিত শইকীয়াৰ মৃত্যুৰ খবৰ জনোৱা হয়৷

উল্লেখযোগ্য যে কভিড-১৯ত মৃত্যুৰ তথ্য দিল্লীৰ চৰকাৰে অসম চৰকাৰক জনাব লাগে যদিও দুই চৰকাৰৰ মাজত সমন্বয়ৰ অভাৱতেই পাঁচ দিন ধৰি এইদৰে মৰ্গতে লোকজনৰ মৃতদেহ পৰি থাকিল।

লগতে পঢ়ক পত্নীৰ চিকিৎসাৰ বাবে বোকাখাতৰ পৰা দিল্লীলৈ যোৱা ব্যক্তিৰ কোভিড-১৯ত আক্ৰান্ত হৈ মৃত্যু

বোকাখাতৰ ম’হমাইকী গাঁৱৰ অজিত শইকীয়াই কেঞ্চাৰত ভোগী থকা তেওঁৰ পত্নী বন্তি শইকীয়াক দিল্লীৰ এখন হস্পিতালত চিকিৎসা কৰাই আছিল।

বন্তি শইকীয়াও কোভিড-১৯ আক্ৰান্ত হৈছিল যদিও বৰ্তমান তেওঁ ইয়াৰ পৰা মুক্ত বুলি জানিব পৰা গৈছে। তেওঁলোকৰ লগত যোৱা বোকাখাতৰে এজন যুৱকৰ সৈতে বৰ্তমান দিল্লীতে আছে বন্তি শইকীয়া।