দিহিং পাটকাইক লৈ মুখ খুলিলে মুখ্য মন্ত্ৰী সৰ্বানন্দ সোণোৱালে

অসমৰ মুখ্য মন্ত্ৰী সৰ্বানন্দ সোণোৱালে শেহতীয়াকৈ চৰ্চাত থকা দিহিং পাটকাই অভয়াৰণ্যক লৈ মুখ খুলিছে।

ইতিমধ্যে বাতৰি প্ৰকাশ পাইছে যে ৰাষ্ট্ৰীয় বন্যপ্ৰাণী ব’ৰ্ডে (NBWL) দিহিং পাটকাই অভয়াৰণ্যত কয়লা খননৰ প্ৰস্তাৱত সেউজ সংকেত দিছে।

বাতৰিমতে, বৰ্ষাৰণ্যখনৰ অন্তৰ্গত হস্তীৰ বাবে সংৰক্ষিত বনাঞ্চলৰ ৯৮.৫৯ হেক্টৰ ভূমিত কয়লা খননৰ অনুমতি দিয়া হৈছে।

বিভিন্ন দল-সংগঠন আৰু ব্যক্তিয়ে এই সন্দৰ্ভত চৰকাৰক সমালোচনা কৰাৰ মাজতে মুখ্য মন্ত্ৰী সোণোৱালে চ’চিয়েল মিডিয়াত নিজৰ মন্তব্য প্ৰকাশ কৰিছে।

সোণোৱালে কয় যে তেওঁ পৰিৱেশ আৰু বন মন্ত্ৰী পৰিমল শুক্লবৈদ্যক দিহিং পাটকাই অভয়াৰণ্য পৰিদৰ্শন কৰি অঞ্চলটোৰ সাম্প্ৰতিক পৰিস্থিতিৰ সবিশেষ বুজ ল’বলৈ নিৰ্দেশ দিছে।

“অসমৰ উন্নয়নৰ সমান্তৰালভাৱে আমাৰ চহকী বনাঞ্চল আৰু জৈৱ বৈচিত্ৰ্যতাৰ সংৰক্ষণ তথা সুৰক্ষাৰ বাবেও আমি সম্পূৰ্ণৰূপে দায়বদ্ধ,” সোণোৱালে কয়।

I have directed Minister of Environment & Forests Shri @ParimalSuklaba1 to visit Dehing Patkai for taking stock of the present condition of the area. We are committed to protect the environment and biodiversity while developing Assam.

— Sarbananda Sonowal (@sarbanandsonwal) May 20, 2020

“পূবৰ এমাজন”ৰূপে জনাজাত বৰ্ষাৰণ্যখনত কয়লা খননৰ বাতৰিক লৈ চ’চিয়েল মিডিয়াত ব্যাপক চৰ্চাৰ লগতে বহুলোকে প্ৰতিবাদ কৰা দেখা গৈছে।

অসমৰো বিভিন্ন দল-সংগঠন-ব্যক্তিয়ে ইয়াৰ প্ৰতিবাদ কৰা দেখা গৈছে।

ডিব্ৰুগড় আৰু তিনিচুকীয়া জিলা সামৰি থকা দিহিং পাটকাই ১১১.১৯ বৰ্গ কি.মি.ৰ এক বৰ্ষাৰণ্য।

চিৰসেউজ এই অভয়াৰণ্যখন জয়পুৰ, আপাৰ দিহিং নৈ আৰু ডিৰক বৰ্ষাৰণ্যক লৈ গঠিত হৈছে।