নাবালিকাক চুমা খাই বিতৰ্কত পাপন : পাপনৰ বিৰুদ্ধে অপপ্ৰচাৰ চলোৱা বুলি অনুৰাগীৰ এজাহাৰ

ৰিয়েলিটি শ্ব’ এটাৰ শ্বুটিঙৰ সময়ত এগৰাকী নাবালিকক চুমা খাই অসমৰ এগৰাকী জনপ্ৰিয় গায়ক পাপন অংগৰাগ মহন্ত তীব্ৰ বিতৰ্কৰ মাজত সোমাই পৰিছে। পাপনৰ এই চুম্বনৰ দৃশ্য সম্বলিত ভিডিঅ’ ক্লিপ এটা কেইটামান ইলেক্ট্ৰনিক মাধ্যমত আৰু ছ’চিয়েল মিডিয়াত প্ৰচাৰিত হোৱাৰ পিছত বিভিন্ন পক্ষৰ পৰা ব্যাপক প্ৰতিক্ৰিয়া অহা দেখা গৈছে। আনকি তেওঁৰ এই অবাঞ্ছিত আচৰণ এতিয়া আদালতৰ মজিয়াও পাইছেগৈ।

ভিডিঅ’টোত দেখা মতে শ্বুটিঙৰ সময়ত পাপনে শিশু শিল্পীসকলৰ সৈতে আনন্দ কৰি থকাৰ মাজতে এগৰাকী ১১-১২ বছৰীয়া ছোৱালীৰ মুখখন নিজৰ ফালে টানি আনি গালত চুমা খায়, যিটোক আপত্তিজনক আচৰণ জ্ঞান কৰিব পাৰি। আনহাতে পাপনে চুমা খোৱাৰ সময়ত ছোৱালীজনীক গালত হাতৰ তলুৱাৰে স্পৰ্শ কৰি মৰম কৰা আৰু ৰং সনা দেখা যায়। জানিব পৰামতে, এই ঘটনা সংঘটিত হৈছিল যোৱা ২০ ফেব্ৰুৱাৰিত।

পাপনৰ এই আচৰণ আপত্তিকৰ বুলি তথা নাবালিকা ছোৱালীৰ প্ৰতি যৌন উৎপীড়নৰ সমপৰ্য্যায়ৰ বুলি গণ্য কৰিছে বহুতে।

ৰুণা ভূঞা নামৰ উচ্চতম ন্যায়ালয়ৰ এগৰাকী অধিবক্তাই এই ভিডিঅ’টোৰ বিষয়বস্তুৰ আধাৰত পাপনৰ আচৰণক নাবালিকাগৰাকীৰ প্ৰতি যৌন আতিশয্যৰ অভিযোগ তুলি national commission for protection of child rights ৰ অধ্যক্ষলৈ অভিযোগপত্ৰ দিছে। নিজৰ পত্ৰখনত তেওঁ পাপনৰ আচৰণত হতচকিত হোৱা বুলি আৰু এইটো এটা যৌন আতিশয্যৰ ঘটনা বুলি উল্লেখ কৰিছে।

আনহাতে ছ’চিয়েল মিডিয়াতো এই ভিডিঅ’টো ভাইৰেল হোৱাৰ লগতে পাপনক তীব্ৰ সমালোচনা কৰা হৈছে। প্ৰায়সকলকে পাপনক গৰিহণা দিয়া দেখা গৈছে।

ইয়াৰ বিপৰীতে পাপনৰ অনুৰাগী একাংশই পাপনৰ আচৰণক আপত্তিজনক নহয় বুলি প্ৰতিপন্নৰ চেষ্টা কৰিছে। সদৌ অসম পাপনিষ্ট নামৰ পাপনৰ অনুৰাগীসকলৰ এটা সংঘই ইলেকট্ৰনিক মাধ্যম আৰু ফেচবুক পেইজৰ বিৰুদ্ধে পাপনক বদনামী কৰাৰ চেষ্টা কৰা বুলি এজাহাৰ দাখিল কৰে। বাৰেপাচি ভুলেৰে অসমীয়াতে লিখা এই এজাহাৰত অৱশ্যে কোনো পক্ষকে নিৰ্দিষ্টকৈ দেখুৱাই দিয়া নাই।