দেশত ক’ৰ’না আক্ৰান্তৰ সংখ্যা ১ লাখ ২৫ হাজাৰ অতিক্ৰম; সুস্থ হৈ উঠিছে ৫১ হাজাৰৰো অধিক লোক

এদিনত ভাৰতত সৰ্বাধিক সংখ্যক লোক ক’ৰ’না ভাইৰাছত আক্ৰান্ত হৈছে।

বিগত ২৪ ঘণ্টাত ভাৰতত ৬,৬৫৪ গৰাকী লোক নতুন কৈ ক’ৰ’না ভাইৰাছত আক্ৰান্ত হয়।

ইয়াৰ ফলত বৰ্তমানলৈ ভাৰতত ক’ৰ’না আক্ৰান্তৰ সংখ্যা ১,২৫,১০১ গৰাকীলৈ বৃদ্ধি পায়।

বিগত ২৪ ঘণ্টাত ৬,৬৫৪ গৰাকী লোক ক’ৰ’নাৰ দ্বাৰা সংক্ৰমিত হোৱাৰ বিপৰীতে ১৩৭ গৰাকী লোকৰ মৃত্যু হয়।

ভাৰতত এতিয়ালৈ ক’ৰ’নাত ৩,৭২০ গৰাকী লোকে প্ৰাণ হেৰুৱাইছে।

বৰ্তমান দেশত ৬৯,৫৯৭ গৰাকী ব্যক্তি চিকিৎসাধীন হৈ আছে।

আনহাতে, যোগাত্মক দিশটো হ’ল ভাৰতত বৰ্তমানলৈ ৫১,৭৮৪ গৰাকী ব্যক্তি চিকিৎসাৰ অন্তত সুস্থ হৈ উঠিছে।

ভাৰতৰ ভিতৰত মহাৰাষ্ট্ৰত সৰ্বাধিক সংখ্যক লোক ক’ৰ’নাৰ দ্বাৰা আক্ৰান্ত হৈছে। মহাৰাষ্ট্ৰত ৪৫,০০০ অতিক্ৰম কৰিছে ক’ৰ’না আক্ৰান্তৰ সংখ্যা।

ভাৰতৰ লগতে অসমতো ক’ৰ’নাৰ সংক্ৰমণ ক্ৰমাগতভাৱে বৃদ্ধি পাইছে।

অসমত বৰ্তমানলৈ ২৫৯ গৰাকী লোক ক’ৰ’না ভাইৰাছৰ দ্বাৰা আক্ৰান্ত হৈছে। ইয়াৰ ভিতৰত চাৰি গৰাকীৰ মৃত্যু হৈছে।

ক’ৰ’নাৰ ফলত বিশ্বৰ ভিতৰত সৰ্বাধিক ক্ষতিগ্ৰস্ত হৈছে আমেৰিকা যুক্তৰাষ্ট্ৰ। আমেৰিকাত ১৬ লাখতকৈ অধিক লোক ক’ৰ’নাৰ দ্বাৰা আক্ৰান্ত হৈছে।