এবাৰ সুস্থ হৈ উঠাৰ পিছত পুনৰ কোভিড-১৯ত আক্ৰান্ত হ’ল বোকাখাতৰ বন্তি শইকীয়া

বোকাখাতৰ অজিত শইকীয়াৰ পত্নী বন্তি শইকীয়া এবাৰ ক’ৰ’না ভাইৰাছত আক্ৰান্ত হৈ সুস্থ হৈ উঠাৰ পিছত পুনৰবাৰ কোভিড-১৯ত আক্ৰান্ত হৈছে।

জানিব পৰা মতে দিল্লীৰ পৰা বোকাখাতলৈ উভতি আহি কাজিৰঙাৰ কহঁৰাৰ জোনাকী কাৰেঙত কোৱাৰেণ্টাইনত থকা বন্তি শইকীয়াৰ স্বাব টেষ্টত কোভিড-১৯ৰ উপস্থিতি ধৰা পৰিছে।

উল্লেখযোগ্য যে কৰ্কট ৰোগৰ চিকিৎসাৰ বাবে পতি আৰু এগৰাকী সম্পৰ্কীয় যুৱকৰ সৈতে দিল্লীত থকাৰ সময়ত বন্তি শইকীয়াৰ লগতে তিনিওজন ব্যক্তি ক’ৰ’না ভাইৰাছত আক্ৰান্ত হৈছিল।

কোভিড-১৯ আক্ৰন্ত হৈ তেওঁৰ পতি অজিত শইকীয়াৰ মৃত্যু হৈছিল যদিও চিকিৎসকে বন্তি শইকীয়া আৰু তেওঁলোকৰ লগত যোৱা যুৱকজনক সুস্থ হৈ উঠা বুলি জনোৱাত তেওঁলোক বোকাখাতলৈ উভটি আহে আৰু জে ডি এচ জি মহাবিদ্যালয়ৰ কোৱাৰেণ্টাইন কেন্দ্ৰত ভৰ্তি হয়।

আজি স্বাব টেষ্টিঙত কোভিড-১৯ পজিটিভ ধৰা পৰাৰ পিছত ৩০গৰাকী আন ৰোগীৰ লগতে বন্তি শইকীয়াকো চিকিৎসাৰ বাবে গোলাঘাটলৈ প্ৰেৰণ কৰা হয়। কোনো লক্ষণ নেদেখুৱাকৈয়ে কৰ্কট ৰোগী বন্তি শইকীয়া পুনৰ কোভিড-১৯ত আক্ৰান্ত হোৱাতো বিশেষ মন কৰিবলগীয়া।

উল্লেখযোগ্য যে বহিঃ ৰাজ্যৰ পৰা অহা লোকৰ বাবে থকা বোকাখাতৰ জে ডি এচ জি মহাবিদ্যালয়ৰ কোৱাৰেণ্টাইন কেন্দ্ৰত থকা ১০১জন লোকৰ ৩১জনৰ শৰীৰত কোভিড-১৯ পজিটিভ ধৰা পৰিছে। ইয়াৰে ২৯জন মহাবিদ্যালয়খনৰ ছাত্ৰ নিৱাসত আৰু ২ গৰাকী ছাত্ৰী নিৱাসত আছিল।