আন্ত:ৰাষ্ট্ৰীয় যোগ দিৱস: প্ৰধান মন্ত্ৰীয়ে ক’লে, কৰ’না সংকটৰ সময়ত যোগ জৰুৰী

আন্ত:ৰাষ্ট্ৰীয় যোগ দিৱস উপলক্ষে প্ৰধান মন্ত্ৰী নৰেন্দ্ৰ মোদীয়ে ৰাষ্ট্ৰক উদ্দেশ্যি দিয়া ভাষণত কয় যে আমাক একত্ৰিত কৰিছে, সংযোগিত কৰিছে, আৰু সেয়াই যোগ।

তেওঁ যোগ দিৱসৰ শুভেচ্ছা জনাই কয় যে যোগ দিৱস ঐক্যবদ্ধতাৰ দিন। যিয়ে দূৰত্ব সমাপ্ত কৰে, সেয়াই যোগ। যোগৰ দ্বাৰা প্ৰতিৰোধ ক্ষমতা বৃদ্ধিত সহায় হয়।

প্ৰধান মন্ত্ৰী মোদীয়ে কয় যে আজি ভাৱনাত্মক যোগৰ দিন। প্ৰতিদিনে প্ৰাণায়াম কৰক। গোটেই বিশ্বতে যোগৰ প্ৰতি উৎসাহ বৃদ্ধি পাইছে। যোগৰ অৰ্থ সমৰ্পণ, সফলতা। যিকোনো পৰিস্থিতিতে অটল থকাৰ নামেই হৈছে যোগ।

তেওঁ কয় যে যোগে কোনো ভেদাভেদ নকৰে। যিকোনো লোকে যোগ কৰিব পাৰে। যোগৰ পৰা শান্তি আৰু সহিষ্ণুতা লাভ হয়। কৰ্মৰ কুশলতাই যোগ। কৰ’নাৰ পৰা ৰক্ষা পাবলৈ যোগ জৰুৰী।

নিজৰ ভাষণত প্ৰধান মন্ত্ৰী মোদীয়ে কয় যে যোগৰ দ্বাৰা পৃথিৱীত শান্তি আৰু সমৃদ্ধি আহে। যোগৰ দ্বাৰা আমাৰ শক্তি কেইবাগুণো বৃদ্ধি পায়।

তেওঁ লগতে কয় যে প্ৰতিকূল পৰিস্থিতিত সক্ৰিয় হৈ থাকিবলৈ যোগ জৰুৰী। নিজৰ দায়িত্বসমূহ পালন কৰাটোও যোগ। নিজৰ লগতে নিজৰ পৰিয়ালৰ লোকৰ স্বাস্থ্যৰ বাব প্ৰচেষ্টা চলাওক।

উল্লেখযোগ্য যে আজি ২১ জুনৰ দিনটো সমগ্ৰ বিশ্বতে আন্ত:ৰাষ্ট্ৰীয় যোগ দিৱস হিচাপে পালন কৰি অহা হৈছে।