৩১ জুলাই পৰ্যন্ত বন্ধ থাকিব আন্তঃৰাষ্ট্ৰীয় যাত্ৰীবাহী বিমানৰ চলাচল

ভাৰতীয় অসামৰিক বিমান পৰিবহন নিগমৰ সঞ্চালক প্ৰধান শুকুৰবাৰে ৩১ জুলাই পৰ্যন্ত আন্তঃৰাষ্ট্ৰীয় যাত্ৰীবাহী বিমানৰ চলাচল বন্ধ থাকিব বুলি প্ৰকাশ কৰে।

অসামৰিক বিমান পৰিবনৰ নিৰ্দেশনা অনুসৰি বিশেষ কাৰণত নিৰ্দিষ্ট পথেৰে কিছু সংখ্যক বিমান চলাচল কৰিব পাৰে বুলিও সঞ্চালক প্ৰধান গৰাকীয়ে লগতে কয়।

ক’ৰ’না ভাইৰাছৰ সংক্ৰমণৰ বাবে বিগত ২৩ মাৰ্চৰ পৰা ভাৰতত আন্তঃৰাষ্ট্ৰীয় যাত্ৰীবাহী বিমান পৰিবহন সেৱা বন্ধ হৈ আছে।

২৬ জুনত এক নিৰ্দেশনা যোগে অসামৰিক বিমান পৰিহন নিগমে ১৫ জুলাই পৰ্যন্ত আন্তঃৰাষ্ট্ৰীয় বিমান পৰিবহন সেৱা বন্ধ থাকিব বুলি উল্লেখ কৰে যদিও পৰৱৰ্তী সময়ত ৩১ জুলাইলৈ আন্তঃৰাষ্ট্ৰীয় বিমান চলাচল বন্ধ থাকিব বুলি জনায়।

ভাৰতত ক’ৰ’নাৰ সংক্ৰমণ ৰোধৰ বাবে ঘোষণা কৰা ল’কডাউনৰ সময়ত সকলো ধৰণৰ আন্তঃৰাষ্ট্ৰীয় আৰু ঘৰুৱা বিমানৰ চলাচল বন্ধ কৰি দিয়া হৈছিল।

বিগত ২৫ মে’ত দুমাহৰ বিৰতিৰ অন্তত দেশত ঘৰুৱা যাত্ৰীবাহী বিমান চলাচল আৰম্ভ হয়।

উল্লেখযোগ্য যে, ক’ৰ’নাৰ  সংক্ৰমণৰ বাবে ভাৰতীয় বিমান পৰিবহনকাৰী সংস্থা সমূহে লোকচানৰ সন্মুখিন হ’বলগীয়া হৈছে।