চামগুৰিৰ ভূৰবন্ধাত ব্যপক খহনীয়া; কেইবাটাও বাসগৃহ জাহ গ’ল ব্ৰহ্মপুত্ৰৰ বুকুত

নেদেখাজনেই যেন এতিয়া শেষ ভৰসা চামগুৰিৰ নৈপৰীয়া দুৰ্ভগীয়া ৰাইজৰ বাবে। বাৰিষা দ্বিতীয়টো বানৰ প্ৰভাৱ কিছু পৰিমাণে শাম কাটিছে যদিও শেহতীয়াকৈ ব্ৰহ্মপুত্ৰৰ গৰাখহনীয়াই এক ভয়াবহ ৰূপ ধাৰণ কৰিছে লাওঁখোৱাৰ ১নং ভূৰবন্ধাৰ পৰা ৪নং ভূৰবন্ধা পৰ্য্যন্ত বৃহত্তৰ অঞ্চলত।

চামগুৰিৰ লাওঁখোৱাৰ ১ নং ভূৰবন্ধাৰ পৰা ৪ নং ভূৰবন্ধা পৰ্যন্ত এক বৃহৎ অঞ্চলত ব্ৰহ্মপুত্ৰৰ গৰাখহনীয়াই ভয়াবহ ৰূপ ধাৰণ কৰিছে।

বিগত প্ৰায় এসপ্তাহ ধৰি ১নং ভূৰবন্ধাত অব্যাহত থকা গৰাখহনীয়াৰ বাবে ব্ৰহ্মপুত্ৰৰ বুকুত বিলিন হৈছে বহু কেইটা পৰিয়ালৰ বাসগৃহ।

ব্যাপক গৰাখহনীয়াই সৰ্বশ্ৰান্ত কৰা ভুক্তভোগী পৰিয়াল সমূহে এতিয়া নিজে সজা হেঁপাহৰ ঘৰখন নিজ হাতেৰে ভাঙি সকলো যাৱতীয় সা-সমগ্ৰী লৈ নিৰাপদ স্থানলৈ ঢাপলি মেলিছে।

তথাপিও বহু আশা আৰু প্ৰত্যাশাৰে সজা ঘৰখনৰ মোহ এৰিব নোৱাৰা বহু কেইটা পৰিয়ালে অন্তিম সময়ত ৰক্ষাৰ বাবে নেদেখাজনৰ ওচৰত শৰণাপন্ন হৈ পৰা দেখা গৈছে।

পৰিত্যক্ত ঘৰখনৰ চোতালতে থকা তুলসীৰ তলত অন্তিম বাৰৰ বাবে ধূপ-দীপ-নৈবদ্য আগবঢ়াই বাকী থকা মাটি-বাৰি খিনিৰ শেষ ৰক্ষা কৰিবলৈ নেদেখাজনৰ ওচৰত আঠু লৈ কাকুতি কৰিছে গৰাখহনীয়া আক্ৰান্ত অঞ্চলটোৰ কেইবাটাও পৰিয়ালে।

লক্ষণীয়ভাৱে বিগত বহু বছৰ ধৰি ভূৰৱন্ধা বাসীয়ে ব্ৰহ্মপুত্ৰৰ বান-গৰাখহনীয়াৰ বাবে দুৰ্ভগ ভোগ কৰি আহিবলগীয় হৈছে আৰু তেওঁলোকৰ এই অৱস্থাৰ প্ৰতি সংশ্লিষ্ট বিভাগে চৰম অৱহেলা কৰাৰ এক গুৰুতৰ অভিযোগ উত্থাপন কৰিছে ভুক্তভূগী নৈপৰীয়া ৰাইজে।

শীঘ্ৰে ১নং ভূৰবন্ধাত গাইড বান্ধ নিৰ্মাণৰ ব্যৱস্থা কৰি বৃহত্তৰ নৈপৰীয়া অঞ্চলটো সুৰক্ষিত কৰিবৰ বাবে শাসনাধিষ্টিত চৰকাৰ খনক আহ্বান জনাইছে লাওঁখোৱা অঞ্চলবাসী ৰাইজে।