পাঠশালাত বানপানীত পৰি কিশোৰৰ মৃত্যু

বৰপেটা জিলাৰ পাঠশালাত পহুমাৰা নৈৰ উপনৈ তুৰকুনিত বানপানীত পৰি দেওবাৰে এজন কিশোৰৰ মৃত্যু হৈছে।

কিশোৰজন পাঠশালা চহৰৰ সমীপৰ পাথলাৰ পৰাগ ভট্টাচাৰ্য্য বুলি চিনাক্ত কৰা হৈছে।

তেওঁ বজালী উচ্চতৰ মাধ্যমিক বিদ্যালয়ৰ উচ্চতৰ মাধ্যমিক দ্বিতীয় বৰ্ষৰ ছাত্ৰ আছিল।

জানিব পৰা মতে কিশোৰজনে ঘৰৰ সমীপৰ বন্ধু কেইজনমানৰ সৈতে বানপানী চাবলৈ গৈছিল।

কিন্তু, নৈৰ কোবাল সোঁতে তেওঁক গভীৰ পানীলৈ উটাই লৈ যায়।

পিছত এছ ডি আৰ এফৰ দলে তেওঁৰ মৃতদেহ পানীৰ পৰা উদ্ধাৰ কৰে।

নেৰানেপেৰা বৰষুণ আৰু ভুটানৰ জলবিদ্যুৎ প্ৰকল্পৰ পৰা এৰা অতিৰিক্ত পানীৰ ফলত পহুমৰা নৈ বিপদসীমাৰ বহু ওপৰেৰে বৈ আছে।

পাঠশালা মহকুমা চিকিৎসালয়খনো বানপানীয়ে বুৰাই পেলাইছে।

চলিত বানত বহু স্কুল, কলেজ আৰু কাৰ্য্যালয়ো পানীত বুৰ গৈছে।