নৰ্থ-ইষ্ট নাওত বাতৰি প্ৰকাশৰ পাছতে কোৱাৰেণ্টাইনত থকা সাংবাদিকলৈ সহায়ৰ হাত ভিন্নজনৰ

ক’ৰ’না ৰোগত আক্ৰান্ত হৈ হ’ম কোৱাৰেণ্টাইনত থকা যুৱ সাংবাদিক কল্প জ্যোতি শইকীয়াক অসম অলিম্পিক সন্থাৰ সম্পাদক লক্ষ্য কোঁৱৰ আৰু দিচপুৰ আৰক্ষী থানাৰ সহকাৰী আৰক্ষী আয়ুক্ত হিমাংশু দাসে ব্যক্তিগতভাৱে খাদ্য সামগ্ৰী প্ৰদান কৰি মহানুভৱতাৰ পৰিচয় দাঙি ধৰিছে।

উল্লেখ্য যে আজি পুৱা কোৱাৰেণ্টাইনত থকাৰ সময়ত খাদ্য-সামগ্ৰীৰ বাৰুকৈয়ে অভাৱ হোৱা বুলি সাংবাদিক গৰাকীয়ে নৰ্থ-ইষ্ট নাওৰ জৰিয়তে  প্ৰকাশ কৰিছিল।

নৰ্থ-ইষ্ট নাওৰ বাতৰিৰ পাছতে অসম অলিম্পিক সন্থাৰ সম্পাদক কোঁৱৰ আৰু ACP দাসে হ’ম কোৱাৰেন্টাইনত থকা যুৱ সাংবাদিক গৰাকীক সহায় কৰাৰ বাবে আগবাঢ়ি আহে।

তেওঁলোকে খাদ্য-সামগ্ৰীৰ তালিকাত সাংবাদিক গৰাকীৰ প্ৰয়োজন অনুসৰি মাছ, আম, মৌচুমী, ফলৰ ৰস, শাক-পাচলি আদি প্ৰদান কৰে।

ইয়াৰ উপৰি তেওঁৰ সতীৰ্থ সাংবাদিক দিগন্ত কুমাৰ দাস, স্মিতা ৰাণী ডেকা, অঞ্জনা দাস, প্ৰশান্ত বৰ্মণ, দ্বীপজ্যোতি শৰ্মা, বিৰচু শৰ্মা, গৌৰাংগ মাধৱ শইকীয়া, পাৰ্থ প্ৰতিম বৰদলৈ, দিব্য জ্যোতি দাস, চিন্ময় ৰয় আৰু হেমন্ত বৰাকে ধৰি আন বহু লোকে তেওঁক খাদ্য সামগ্ৰী প্ৰদান কৰে।

আনহাতে মানৱ অধিকাৰ কৰ্মী ড০ দিব্যজ্যোতি শইকীয়াইও সহায়ৰ হাত আগবঢ়ায়।

সাংবাদিক কল্পজ্যোতি শইকীয়াই  তেওঁক কৰা সহায়ৰ বাবে সকলোকে ধন্যবাদ জ্ঞাপন কৰে।

ইফালে খাদ্যৰ সংকটত বোগা বুলি বাতৰি প্ৰকাশ পোৱাৰ পাছতো স্বাস্থ্য বিভাগ বা কামৰূপ মহানগৰ জিলা প্ৰশাসনৰ তৰফৰ পৰা কোনো ধৰণৰ খবৰ নোলোৱাৰ অভিযোগ উত্থাপন কৰিছে সাংবাদিকজনে।