চৰকাৰৰ সিদ্ধান্ত: ৩১ ডিচেম্বৰলৈ ঘৰতে থাকি কাম কৰিব পাৰিব তথ্য-প্ৰযুক্তিৰ কৰ্মচাৰীয়ে

ক’ৰ’ণাতংকৰ বাবে দেশত এতিয়া বিৰাজ কৰিছে স্থিতাৱস্থাই। এনে পৰিস্থিতিত বন্ধ হৈ পৰিছে চৰকাৰী তথা বে-চৰকাৰী কাৰ্যালয় সমূহ।

কিছু কিছু ৰাজ্যই সীমিত সংখ্যক কৰ্মচাৰীৰে কাৰ্যালয় খুলিছে যদিও পৰিস্থিতি এতিয়াও স্বাভাৱিক হোৱা বুলি কব নোৱাৰি। ক’ৰ’ণাতংকৰ বাবে দেশৰ অন্যান্য খণ্ডৰ লগতে ক্ষতিৰ সন্মুখীন হোৱা এটি খণ্ড হৈছে তথ্য প্ৰযুক্তিৰ খণ্ড।

তথ্য প্ৰযুক্তিৰ খণ্ডত কাম কৰা সকলে লকডাউনৰ পৰাই ঘৰতে থাকি কাম চম্ভালি আহিছে।

তথ্য প্ৰযুক্তিৰ খণ্ড লোক সকলে জুলাই মাহৰ শেষৰ পিনে কাৰ্যালয়লৈ আহি কাম কৰিব লাগিব বুলি চৰকাৰে ইংগিত দিছিল যদিও শেহতীয়াকৈ চৰকাৰে সেই স্থিতিৰ সলনি কৰি ৩১ ডিচেম্বৰলৈকে তথ্য প্ৰযুক্তিৰ খণ্ডৰ লোক সকলে ঘৰৰ পৰাই কাম কৰিব পাৰিব বুলি নিৰ্দেশনা জাৰি কৰিছে।

ভাৰত চৰকাৰৰ টেলিকম দপ্তৰে এই সন্দৰ্ভত বুধবাৰে জাননী জাৰি কৰিছে।

টেলিকম দপ্তৰৰ এনে সিদ্ধান্তক আদৰণি জনাইছে উইপ্ৰ’ৰ অ্ধ্যক্ষ প্ৰেমজীয়ে।

নাছকমৰ অধ্যক্ষ দেৱযানী ঘোষেও চৰকাৰৰ সিদ্ধান্তক আদৰণি জনাই কৈছে যে চৰকাৰৰ এনে সিদ্ধান্ত ক’ৰ’ণা ভাইৰাছৰ মহাসংক্ৰমমৰ সময়ত সঠিক সিদ্ধান্ত হৈছে।