লকডাউনত সন্মুখীন হোৱা সমস্যাক লৈ বক্তব্য ৰখা মহিলাক ফোনযোগে ভাবুকি; দিচপুৰ থানাত এজাহাৰ

লকডাউনত সন্মুখীন হোৱা সমস্যাৰ বিষয়ে বিৱৰি এটা ব্যক্তিগত সংবাদ প্ৰতিষ্ঠানত নিজৰ বক্তব্য দিয়া মহিলাক ফোনযোগে ভাবুকি দিছে কোনো অচিনাকি ব্যক্তিয়ে।

মহানগৰীৰ বাঘৰবৰী চানেকি পথৰ তৃষ্ণা নাথ নামৰ মহিলাগৰাকীক চৰকাৰ বিৰোধী মন্তব্য তথা মুখ্য মন্ত্ৰীক সমালোচনা নকৰিবলৈ ভাবুকি দিয়ে।

কালি নিশা প্ৰায় ৯:৩০ বজাত ৬০০০৪৭৪৯০০ নম্বৰৰ পৰা কোনো অচিনাকি কণ্ঠৰ লোকে ভাবুকি দিয়ে তৃষ্ণাক।

“তুমি মানুহ চিনি নোপোৱা, চৰকাৰ বিৰোধী কথা কিয় কৈ আছা? মুখ্য মন্ত্ৰীৰ বিষয়ে কিয় কৈছা তুমি? তোমাৰ ঘৰ ক’ত?  দ্বিতীয়বাৰ চৰকাৰ বিৰোধী কথা নক’বা। চৰকাৰৰ বিৰুদ্ধে দ্বিতীয়বাৰ ক’লে তোমাৰ দিগদাৰ আছে। মাইকী মানুহ মাইকী মানুহ হৈ থাকিবা।” ফোনযোগে এইদৰে কোনো অচিনাকি লোকে ভাবুকি দিয়ে তৃষ্ণাক।

ইতিমধ্যে, কলৰেকৰ্ডিংসহ দিচপুৰ থানাত এজাহাৰ দাখিল কৰিছে মহিলাগৰাকীয়ে।

এজাহাৰ দাখিল কৰি আহি মহিলাগৰাকীয়ে আমাৰ সাংবাদিকৰ আগত কয়, “মই আশা কৰিছো দিচপুৰ আৰক্ষীয়ে এই অচিনাকি লোকজনৰ বিৰুদ্ধে ব্যৱস্থা গ্ৰহণ কৰি মোক ন্যায় প্ৰদান কৰে যেন। মোৰ তিনিটা সন্তানৰ সৈতে মই অকলে থাকো তেনেক্ষেত্ৰত মোৰ নিৰাপত্তা ক’ত?”

লকডাউনৰ সময়ছোৱাত দৰিদ্ৰ তথা খাটি খোৱা লোকসকল বহু অসুবিধাৰ সন্মুখীন হৈছিল।

“আমাৰ দুখ-দুৰ্দশাৰ কথাবোৰ আমি আমাৰ মুৰব্বী হিচাপে মুখ্য মন্ত্ৰী আৰু স্বাস্থ্য মন্ত্ৰীকে জনাম। তেনেক্ষেত্ৰত এনেদৰে ভয়-ভাবুকিৰ সন্মুখীন হ’লে আমি কেনেদৰে মনৰ কথাবোৰ প্ৰকাশ কৰিম?” তৃষ্ণাই এইদৰে প্ৰশ্ন কৰি কয়।

উল্লেখযোগ্য যে, এগৰাকী সাধাৰণ মহিলা হিচাপে তথা সদৌ অসম মধ্যাহ্ন ভোজন ৰান্ধনী আৰু সহায়িকা সন্থাৰ উপদেষ্টা হিচাপে লকডাউনৰ সময়ত ৰান্ধনীসকলে সন্মুখীন হোৱা বিভিন্ন সমস্যাৰ বিষয়ে সামাজিক মাধ্যম আৰু এটা ব্যক্তিগত ৱেব পৰ্টেলত তেওঁ বক্তব্য প্ৰকাশ কৰিছিল।