আগষ্টত খুলিব নে চিনেমা হল! : তথ্য সম্প্ৰচাৰ দপ্তৰৰ আবেদনৰ প্ৰত্যুত্তৰত কি ক’লে গৃহ মন্ত্ৰালয়ে

দেশত এতিয়াও নিয়ন্ত্ৰণলৈ অহা নাই মহামাৰী ক’ৰ’নাৰ সংক্ৰমণ।

তাৰ মাজতে কেন্দ্ৰীয় তথ্য আৰু সম্প্ৰচাৰ মন্ত্ৰালয়ে কেন্দ্ৰীয় গৃহ মন্ত্ৰালয়লৈ এক পত্ৰ প্ৰেৰণ কৰিছে।

উক্ত পত্ৰৰ যোগে কেন্দ্ৰীয় তথ্য আৰু সম্প্ৰচাৰ মন্ত্ৰালয়ে কেন্দ্ৰীয় গৃহ মন্ত্ৰালয়ক অহা আগষ্ট মাহৰ পৰা দেশৰ চিনেমা হলবোৰ পুনৰ খোলাৰ বাবে আবেদন জনাইছে।

উল্লেখ্য যে যোৱা তিনি মাহ ধৰি দেশৰ চিনেমা হলবোৰ বন্ধ হৈ আছে।

দেশত ল’কডাউনৰ সময়ছোৱাত চিনেমাৰ শ্বুটিঙো বন্ধ আছিল যদিও বৰ্তমান শ্বুটিঙৰ অনুমতি প্ৰদান কৰিছে চৰকাৰে।

ইফালে যোৱা তিনি মাহ ধৰি ছবি গৃহ বন্ধ হৈ থকাৰ ফলত বিস্তৰ লোকচানৰ মুখামুখি হৈছে ছবি প্ৰযোজক সংস্থাবোৰ।

বহু প্ৰযোজক সংস্থাই উপায়হীন হৈ নিজৰ ছবিসমূহ অ’টিটি প্লেটফৰ্মত মুক্তি দিবলৈও বাধ্য হৈ পৰিছে। তেওঁলোকৰ বাবে একমাত্ৰ ভৰসা যেন হৈ পৰিছে অ’টিটি প্লেটফৰ্মসমূহ।

এনে সংকটৰ পৰা উদ্ধাৰ বাবে তথ্য আৰু সম্প্ৰচাৰ মন্ত্ৰালয়ে অহা আগষ্টৰ পৰা কিছুমান কঠোৰ নীতি বলৱৎ কৰি দেশৰ ছহিগৃহ পুনৰ খোলাৰ বাবে আগ্ৰহ প্ৰকাশ কৰিছে।

সূত্ৰৰ খবৰ অনুসৰি ইতিমধ্যে তথ্য আৰু সম্প্ৰচাৰ মন্ত্ৰালয়ে বিনোদন ইণ্ডাষ্ট্ৰিৰ চি আই আই মিডিয়া কমিটিৰ সৈতে এক গোপন বৈঠকত মিলিত হৈছে। এই সন্দৰ্ভত কেন্দ্ৰীয় গৃহ মন্ত্ৰালয়ে চূড়ান্ত সিদ্ধান্ত গ্ৰহণ কৰিব বুলি জানিব পৰা গৈছে।

ইফালে তথ্য আৰু সম্প্ৰচাৰ মন্ত্ৰালয়ৰ সচিব অমিত খাৰে ১ পৰা ৩১ আগষ্টত দেশৰ চিনেমা হলসমূহ খোলাৰ বাবে গহ মন্ত্রালযৰ সচিব অজয় ভাল্লাৰ সৈতে আলোচনা চলিছে বুলিও জনাইছে।

সূত্ৰৰ খবৰ অনুসৰি আগষ্টৰ মাহৰ পৰা চিনেমা হল পুনৰ খুলিলেও সামাজিক দূৰত্ব নিশ্চিত কৰিব লাগিব হলবোৰে।

সেই অনুসৰি দুই শাৰী আসনৰ মাজত এশাৰী আসন বাদ দি আৰু শাৰীটোৰ আসন সমূহৰ মাজত দুই মিটাৰ দূৰত্বৰ ব্যৱধান ৰাখি দৰ্শকক বহোৱাব লাগিব।

অৰ্থাৎ ২৫ শতাংশ দশকেৰে হলবোৰে ছবিগৃহত ছবি প্ৰদৰ্শন কৰিব লাগিব।

ইপিনে এই সন্দৰ্ভত কেন্দ্ৰীয় গৃহ সচিব অজয় ভাল্লাই চূড়ান্ত সিদ্ধান্ত গ্ৰহণ কৰিব বুলি জানিব পৰা গৈছে। তেওঁৰ ওপৰতে নিৰ্ভৰ কৰিছে দেশৰ বিনোদন উদ্যোগৰ পৰৱৰ্তী ভৱিষ্যৎ।