ক্ষমতাৰ বাবে প্ৰথম কাৰ্য্যকালতে বিজেপিত আৰম্ভ নেকি পূৰ্বৰ কংগ্ৰেছৰ দৰে বিসম্বাদ?

ক্ষমতাৰ লোভত বিজেপিত আৰম্ভ নেকি পূৰ্বৰ কংগ্ৰেছৰ দৰে বিসম্বাদ? বিশেষকৈ ২০১৩ চনৰ পৰা কংগ্ৰেছৰ ভিতৰছোৱাত মন্ত্ৰী হিমন্ত বিশ্ব শৰ্মা কেন্দ্ৰিক যি বিসম্বাদ আৰম্ভ হৈছিল সেই বিসম্বাদেৰেই পুনৰ উক-মুকনি লৈছে নেকি কংগ্ৰেছত? এই প্ৰশ্ন উত্থাপিত হৈছে সচেতন মহলত।

কিয়নো শেহতীয়াকৈ আজি তেজপুৰ চিকিৎসা মহাবিদ্যালয়ত প্লাজমা প্ৰদানৰ এক অনুষ্ঠানত অংশগ্ৰহণ কৰি সংবাদমাধ্যমৰ আগত এক বিশেষ মন্তব্য কৰিছে। যি মন্তব্যই বিজেপিৰ ভিতৰত উমি উমি জ্বলি থকা বিসম্বাদৰ জুইকুৰাৰ উমান পোৱা বুলি কিছু কিছুৱে ক’বলৈ বিচাৰে।

সাংবাদিকে সোধা প্ৰশ্নৰ উত্তৰত ৰাজ্যিক স্বাস্থ্য মন্ত্ৰী পিযুষ হাজৰিকাই কয় ‘মুখ্য মন্ত্ৰী হোৱাৰ যোগ্যতা আছে মন্ত্ৰী হিমন্ত বিশ্ব শৰ্মাৰ।

তেওঁ আৰু কয় ‘হিমন্ত বিশ্ব শৰ্মা অতি সফল মন্ত্ৰী। গতিকে তেওঁৰ মুখ্য মন্ত্ৰী হোৱাৰ যোগ্যতা নিশ্চয়কৈ থাকিব।‘

অৱশ্যে এইক্ষেত্ৰত দলে যি সিদ্ধান্ত ল’ব বা বিধায়কে যি সিদ্ধান্ত ল’ব সেইটোৱে হ’ব বুলি তেওঁ দাবী কৰে।

‘তেওঁৰ যোগ্যতা থকা বুলি সকলোৱে জানে। হিমন্ত বিশ্ব শৰ্মা ২০ বছৰ ধৰি অতি সফল মন্ত্ৰী। মইটো ক্লেয়াৰ কাট কথা কওঁ তেওঁ অতিকৈ যোগ্য।‘ হিমন্ত বিশ্ব শৰ্মাৰ প্ৰতি অতি বিশ্বাসযোগ্যতা দেখুৱাই এইদৰে মন্তব্য কৰে ৰাজ্যিক স্বাস্থ্য মন্ত্ৰীগৰাকীয়ে।

এইখিনিতে পুনৰ উল্লেখ কৰিছো বিসম্বাদৰ জুইকুৰা উমি উমি জ্বলিবলৈ আৰম্ভ কৰাৰ প্ৰমাণ পিযুষ হাজৰিকাৰ এই মন্তব্যই সূচাইছে নেকি?

ইপিনে, এসময়ৰ গগৈৰ মন্ত্ৰী সভাৰ অতি দক্ষ মন্ত্ৰী হিচাপে প্ৰায় ১৫ বছৰ কাল মন্ত্ৰীত্ব লাভ কৰা হিমন্ত বিশ্ব শৰ্মাই অৱশেষত ৩ বছৰ কাল থকাৰ সময়তে ক্ষমতাৰ বাবে বিসম্বাদ আৰম্ভ কৰিছিল বুলি চৰ্চিত হৈছিল।

এই বিসম্বাদৰ ফলতেই কংগ্ৰেছ দলটো চূৰ্ণ-বিচূৰ্ণ হৈছিল আৰু নিৰ্বাচনত অতিকৈ বেয়া ফলাফল হৈছিল।

প্ৰশ্ন হয়, বিজেপিৰ প্ৰথম পাঁচ বছৰতে এই বিসম্বাদ আৰম্ভ হৈছে নেকি? এইক্ষেত্ৰত এটা কথা ক’ব লাগিব যে যিসকল প্ৰকৃতাৰ্থত বিজেপি বা বহু পূৰ্বৰে পৰা বিজেপিৰ সৈতে জৰিত হৈ আছিল সেইসকলৰ যেন বৰ্তমান গুৰুত্ব কমি আহিছে দলৰ মজিয়াত। গতিকে বিপদৰ সময়ত অসমত দলটোক ধৰি ৰখা পুৰণি বিজেপিৰ ভুমিকা কি হ’ব?

বাহিৰৰ পৰা আহি বা অন্য ৰাজনৈতিক দলৰ পৰা আহি বিজেপিত বিভিন্ন পদ লৈ বা মন্ত্ৰিত্ব লৈ দপ দপাই আছে বা তেওঁলোকৰ হাতৰ মুঠিলৈ দলটোক নিবলৈ চেষ্টা কৰি আছে। এওঁলোকেই এতিয়া বিজেপিত সৰ্বে-সৰ্বা হ’বলৈ চেষ্টা কৰিছে নেকি?

ইপিনে, কংগ্ৰেছী নেতাসকলৰ বিজেপিত যোগদানৰ সময়তে বহু বিজেপিৰ পুৰণি নেতাই বিজেপি ত্যাগ কৰিছিল। ইয়াৰোপৰি, ৰাম প্ৰসাদ শৰ্মাৰ দৰে নেতাই প্ৰথমতে বিদ্ৰোহ কৰি পাছলৈ বিজেপি ত্যাগ কৰি কংগ্ৰেছত যোগদান কৰিলে।

সকলোৱে জ্ঞাত যে বিজেপিত এতিয়া বিজেপিত দুটা ফৈদৰ সৃষ্টি হৈছে। এটা হৈছে কংগ্ৰেছৰ পৰা অহা গ্ৰুপ আৰু আনটো হৈছে অগপ বা অন্য আঞ্চলিক শক্তিৰ পৰা অহা গ্ৰুপ। ইতিমধ্যে এই ফৈদ দুটাৰ মাজত শীতল যুদ্ধ আৰম্ভ হৈ গৈছে।

আজি পিযুষ হাজৰিকাই কৰা বক্তব্যই সেই শীতল যুদ্ধ ৰাজহুৱা হোৱাৰে ইংগিত দিছে নেকি?

বিজেপিৰ ভিতৰছোৱাত চলি থকা শীতল যুদ্ধৰ বিষয়ে বিজেপিৰ উচ্চ পৰ্য্যায়ৰ নেতাসকল অৱগত হয় নে নহয় সেয়াও লক্ষণীয় বিষয়। তথা জ্বলি থকা বিসম্বাদৰ জুইকুৰা নিৰ্বাপিত কৰাত দলীয় নেতৃত্বই কেনেধৰণৰ ব্যৱস্থা ল’ব সেয়াও লক্ষণীয়।

আনহাতে, পূৰ্বে চলা চৰ্চা অনুসৰি দক্ষ মন্ত্ৰী ড০ হিমন্ত বিশ্ব শৰ্মাই ৫০ ৰো অধিক বিধায়কৰ স্বাক্ষৰ লৈ কংগ্ৰেছৰ হাই কামাণ্ডক সাক্ষাৎ কৰিছিল যদিও হাই কামাণ্ডে তেওঁৰ বিপৰীতে তৰুণ গগৈৰ ওপৰত আস্থা প্ৰকাশ কৰাত সেই অভিযান ব্যৰ্থ হৈছিল। তেতিয়াই তেওঁ কংগ্ৰেছৰ হাই কামাণ্ডৰ বিৰুদ্ধে বিষোদগাৰ কৰি প্ৰায় একাষৰীয়া হৈ পৰিছিল।

সেই সময়তে সমগ্ৰ ভাৰতত বিজেপিৰ উত্থান হোৱাত তথা বিজেপিয়ে কেন্দ্ৰত চৰকাৰ গঠন কৰাত তেওঁ বিজেপিৰ ফালে ধাৱমান হৈছিল।

সেই একেই ধৰণে বিজেপি দলতো মুখ্য মন্ত্ৰী হোৱাৰ বাবে কচৰৎ আৰম্ভ কৰিছে নেকি বুলি প্ৰশ্ন উত্থাপিত হৈছে। যদিও বিজেপিত হাই কামাণ্ড নাই, সংঘ পৰিয়ালকে বিজেপিৰ হাই কামাণ্ড বুলি ধৰিব পাৰি।

সংঘ পৰিয়ালৰ নেতাৰ আশীৰ্বাদ অবিহনে বিজেপিত আৰম্ভ হোৱা এই বিসম্বাদে পূৰ্ণতা পাই নে নাই সেয়া এতিয়ালৈকে স্পষ্টকৈ প্ৰকাশ কৰিব নোৱাৰি।