ৰাজহুৱা স্থানত পৰিধান কৰিব নালাগে মাস্ক ,চৰকাৰী নিৰ্দেশনাকলৈ ক’ত হৈছে প্ৰতিক্ৰিয়া ?

বিগত বৰ্ষৰ ডিচেম্বৰ মাহত চীনৰ ওহান প্ৰদেশত সংক্ৰমণ আৰম্ভ হৈ সমগ্ৰ বিশ্বতে সংহাৰৰ সৃষ্টি কৰা ক’ৰ’ণা ভাইৰাছ এতিয়া দেশ খনত সম্পূৰ্ণ নিয়ন্ত্ৰণলৈ আহিছে।

সেইবাবেই চীনৰ চৰকাৰে দেশ থনৰ ৰাজধানী চহৰ বেইজিঙত মাস্ক পৰিধানৰ ক্ষেত্ৰত জাৰি কৰা নিৰ্দেশনা প্ৰত্যাহাৰ কৰিছে।

চীনৰ চৰকাৰৰ এগৰাকী মুখপাত্ৰই প্ৰকাশ কৰা মতে চীনৰ কোনো অঞ্চলৰ পৰাই বিগত ১৩ দিনত ক’ৰ’ণা ভাইৰাছ সংক্ৰমণৰ এটাও নতুন ঘটনা পোহৰলৈ অহা নাই।

সেইবাবে বেইজিঙৰ পৰা মাস্ক পৰিধানৰ নিৰ্দেশনা প্ৰত্যাহাৰ কৰা হৈছে।

মানুহে এতিয়া মাস্ক পৰিধান নকৰাকৈয়ে ৰাজহুৱা স্থানত ঘূৰা-ফুৰা কৰিব পাৰিব বুলি তেওঁ কয়।

উল্লেখ্য চলিত বৰ্ষৰ এপ্ৰিল মাহতো চীনৰ চৰকাৰে মাস্ক পৰিধানৰ ক্ষেত্ৰত থকা নিৰ্দেশনা প্ৰত্যাহাৰ কৰিছিল যদিও দেশখনত পুনৰ ক’ৰ’ণা ভাইৰাছৰ সংক্ৰমণ আৰম্ভ হোৱাত জুন মাহত পুনৰ মাস্ক পৰিধানৰ ক্ষেত্ৰত থকা নিষেধাজ্ঞা জাৰি কৰা  হৈছিল।

এতিয়া পুনৰ মাস্ক পৰিধানৰ নিৰ্দেশনা প্ৰত্যাহাৰ কৰাৰ পিছত দেশ খনত পুনৰ ক’ৰ’ণাৰ সংক্ৰমণ হ’ব পাৰে বুলি বহুতে আশংকা কৰিছে। চৰকাৰক সেয়ে বিষয়টো বিবেচনা কৰাৰ আহ্বান জনাইছে বহুতে।

ইপিনে ক’ৰ’ণাৰ অভিকেন্দ্ৰ ওহানত এতিয়া মানুহে মুখা নিপিন্ধাকৈয়ে নৃত্য-গীতত ভাগ লৈছে।