অস্তিত্বৰ সংকটত ৬০০/২ নং বৰভালুকী প্ৰাথমিক বিদ্যালয়; ষড়যন্ত্ৰৰ পৰা প্ৰশাসনক বচোৱাৰ অনুৰোধ স্থানীয় ৰাইজৰ

চৰকাৰী শিক্ষক‍ক স্বেচ্ছাই অৱসৰ গ্ৰহণ কৰা প্ৰসংগই ৰাজ্যজুৰি বিতৰ্ক সৃষ্টি কৰাৰ সময়তে ৰাজ্যৰ বহু চৰকাৰী শিক্ষানুষ্ঠান এতিয়া অস্তিত্বৰ সংকটত ভূগিছে। এফালে চৰকাৰৰ মাহীআইৰ দৃষ্টি, আনফালে স্থানীয় একাংশ লোকৰ ষড়যন্ত্ৰৰ প্ৰকোপত অনিশ্চিত ভৱিষ্যতৰ গৰাহত পৰিছে বহু বছৰ পুৰণি তথা বহুজনৰ জীৱন গঢ়া একাংশ শিক্ষানুষ্ঠান।

এইক্ষেত্ৰত ব্যতিক্ৰম নহয় মন্ত্ৰী ৰঞ্জিত দাসৰ পাটাছাৰকুছি সমষ্টিৰ বৰভালুকী গাঁৱৰ ভৰালীপাৰা চুবুৰীৰ ১৯৪৮ চনতে প্ৰতিষ্ঠা লাভ কৰা তথা ৭৪ বছৰ গৰকা, ৬০০/২ নং বৰভালুকী প্ৰাথমিক বিদ্যালয়খন। এই বিদ্যালয়খন ভালুকী হাইস্কুলৰ লগত চামিলকৰণৰ খবৰত ৰাইজে দুখ প্ৰকাশ কৰাৰ লগতে এই কাণ্ডৰ লগত জড়িত চক্রক গৰিহণা দিছে।

লগতে পঢ়ক: হঠাৎ দিখৌ নদীৰ পানীয়ে সলাইছে ৰং; প্ৰথমে নীলা তাৰ পিছত সেউজীয়া হৈ পৰিছে দিখৌৰ পানী

উল্লেখ্য যে, বিদ্যালয়খনত বৰ্তমান ৩০ জনতকৈ অধিক ছাত্ৰ ছাত্ৰী আছে। কিন্তু একাংশ লোকে ষড়যন্ত্ৰ কৰি ১১ গৰাকী শিক্ষাৰ্থী থকা বুলি প্ৰশাসনক বিপথে পৰিচালিত কৰি বন্ধ কৰাৰ ষড়যন্ত্ৰ ৰচা বুলি স্থানীয় ৰাইজে অভিযোগ উত্থাপন কৰিছে।

সেইদৰে, ভৌগোলিক দিশৰ পৰা চাবলৈ গ’লে বিদ্যালয়খন ভালুকী হাইস্কুলৰ পৰা ১ কিলোমিটাৰতকৈ অধিক দুৰত্বত অৱস্থিত। তেনেস্থলত চামিলকৰণ হ’লে কণ কণ শিক্ষাৰ্থীসকলৰ যাতায়ততো সমস্যা আহি পৰাৰ শংকাত ভূগিছে সচেতন ৰাইজে। তেনেস্থলত এনে অভিসন্ধিত জড়িতসকলক ৰাইজে গৰিহনা দিছে।

লগতে পঢ়ক: হোটেল ব্যৱসায়ীক অপহৰণ, ধন দাবী; হাউলী আৰক্ষীৰ জালত ৫ ভুৱা দুর্নীতি নিবাৰক বিষয়া

তদুপৰি বিদ্যালয়খন গঞা ৰাইজৰ বাবে পূৰ্বৰে পৰা ভোটকেন্দ্ৰ হিচাপেও ব্যৱহাৰ হৈ আহিছে। এই সকলো দিশৰ পৰা লক্ষ্য ৰাখি গুৰুত্বপূৰ্ণ বিদ্যালয়খন যাতে একে স্থানতে থাকে, তাৰ বাবে উদ্ধৰ্তম কৰ্তৃপক্ষক ব্যৱস্থা গ্ৰহণ কৰিবলৈ অনুৰোধ জনাইছে স্থানীয় ৰাইজে।