অপ্ৰতিৰোধ্য কেলিফ’ৰ্ণিয়াৰ বনজুই : দিনে জ্বলিছে ৯ বৰ্গ মাইল বনভূমি, মৃত্যু হৈছে ১১ জন লোকৰ

ব্ৰাজিল আৰু অষ্ট্ৰেলিয়াৰ পাছত আমেৰিকাৰ কেলিফ’ৰ্ণিয়াত জ্বলি থকা বিধ্বংসী বনজুইয়ে আৰু অধিক বিধ্বংসী ৰূপ ধাৰণ কৰিছে।

এতিয়াও নিৰ্বাপিত হোৱা নাই মাৰ্কিন যুক্তৰাষ্ট্ৰৰ কেলিফ’ৰ্ণিয়াৰ এই বিধ্বংসী বনজুই।

বিগত তিনি সপ্তাহ ধৰি জ্বলি থকা কেলিফ’ৰ্ণিয়াৰ এই বনজুইত অগ্নিদগ্ধ হৈ মৃত্যু হোৱা লোকৰ সংখ্যা ১১ জনলৈ বৃদ্ধি হৈছে।

বুধবাৰে পুনৰ তিনিজন লোক এই বনজুইত অগ্নিদগ্ধ হৈ মৃত্যুমুখত পৰিছে।

এই বনজুইত কেলিফ’ৰ্ণিয়াৰ সমতল আৰু পাহাৰসহ ২.৫ মিলিয়ন একৰ সেউজ বনভূমি জাহ গৈছে। ৩ হাজাৰৰো অধিক ঘৰ ভস্মীভূত হৈছে এই বনজুইত।

প্ৰতি দিনে প্ৰায় ২৫ বৰ্গ মাইলকৈ সেউজ বনভূমি জ্বলি ছাই হৈছে এই বনজুইত।

ইতিমধ্যে ২ লাখৰো অধিক লোকক নিৰাপদ স্থানলৈ স্থানান্তৰ কৰা হৈছে।

৫৬০ ৰো অধিক বন্য জীৱ-জন্তু এই বনজুইত জাহ গৈছে। বন্য প্ৰাণীৰ উদ্ধাৰ অভিযানো অব্যাহত ৰাখিছে স্থানীয় প্ৰশাসনে।

বনজুই নিৰ্বাপন কৰিবলৈ ১২ হাজাৰ অগ্নিনিৰ্বাপক বাহিনীৰ লোক, হেলিকপ্টাৰ আৰু এয়াৰক্ৰাফ্ট নিয়োজিত কৰা হৈছে যদিও জুই নিয়ন্ত্ৰণলৈ অহা নাই। বৰং নতুন নতুন ঠাইলৈ বিয়পি গৈছে বনজুই।

অতি কম সময়ৰ ভিতৰতে বিয়পি পৰা এই বনজুইক ইতিহাসৰ আটাইতকৈ ভয়ানক বনজুই বুলি অভিহিত কৰিছে মাৰ্কিন প্ৰশাসনে।

ইফালে কেলিফ’ৰ্ণিয়াৰ গভৰ্ণৰ গেভিন নিউছমে বনজুই নিয়ন্ত্ৰণৰ বাবে অষ্ট্ৰেলিয়া আৰু কানাডাক সহায়ৰ বাবে আবেদন জনাইছে।

উল্লেখ্য বজ্ৰপাতৰ পৰা সূত্ৰপাত হোৱা বুলি সন্দেহ কৰা হৈছে এই বনজুইৰ।