ৰাখে হৰি মাৰে কোনে? চলন্ত ৰে’লৰ ইঞ্জিনৰ তলত পৰিও নিৰ্বিঘ্নে উদ্ধাৰ দুবছৰীয়া শিশু

ৰাখে হৰি মাৰে কোনে? এই আপ্ত বাক্যটি যেন সঁচা অৰ্থত আকৌ এবাৰ প্ৰমানিত হ’ল। চলন্ত ৰে’লৰ ইঞ্জিনৰ তলত সোমাই পৰিও বাচি গ’ল এটি দুবছৰীয়া শিশু।

সহজ ভাষাত যমৰ দুৱাৰমুখৰ পৰা উভতি আহিল সেই দেৱশিশু। এই ঘটনাৰ পাছত শিশুটিক ঘুৰাই পোৱা মাতৃয়ে আনন্দত আত্মহাৰা হৈ পৰে।

ঘটনা অনুসৰি, পিতৃ-মাতৃ আৰু এজন ককায়েকৰ সৈতে দিল্লীৰ ফৰিদাবাদৰ বল্লভগড় ষ্টেশ্যনৰ ওচৰত বাস কৰে শিশুটি।

ককায়েকৰ সৈতে ৰে’ল লাইনৰ কাষত শিশুটিয়ে খেলি আছিল। ককায়েকৰ বয়সো তাতকৈ অকনমানহে বেছি। স্বাভাৱিকতেই অবুজন।

খেলি থকাৰ মাজতে ককায়েকে শিশুটিক ঠেলা মাৰি দিয়ে। শিশুটি চিধাই গৈ ৰে’ল লাইনৰ মাজত পৰি যায়।

সেই সময়তে আন দিশৰ পৰা এখন মালগাড়ী বেগাই আহি আছিল। ৰে’লৰ চালকে দূৰৰ পৰা ৰে’ল লাইনৰ ওপৰত পৰি থকা শিশুটিক দেখা পায় আৰু একেৰাহে সজোৰে হৰ্ণ বজাই থাকে।

ৰে’লখন দূৰৰ পৰা ভায়েকৰ পিনে বেগাই আহি থকা শিশুটিৰ ককায়েকে দেখা পাই ভাতৃক ৰক্ষা কৰাৰ বাবে আঁতুৰ হৈ পৰে। উপায়হীন হৈ সি চিঞৰিবলৈ ধৰে।

ইপিনে, ৰে’লৰ চালকজনে শিশুটিক বচাবলৈ তৎপৰ হৈ পৰে আৰু ততাতয়াকৈ জৰুৰীকালীন ব্ৰেক টানে। মাজ ৰাস্তাতে ৰে’লখন ৰৈ যায় যদিও শিশুটি ৰে’লখনৰ ইঞ্জিনৰ তলত সোমাই পৰে।

ইমান সময়ে চৌপাশৰ পৰা বহুত মানুহ আহি তাত সমবেত হয় আৰু হুলস্থুল লাগি পৰে। কিন্তু ৰাখে হৰি মাৰে কোনে?

ইঞ্জিনৰ তলৰ পৰা শিশুটিক অক্ষত অৱস্থাত উদ্ধাৰ কৰা হয়। সম্পূৰ্ণ সুস্থ শিশুটিত তাৰ মাকৰ হাতত তুলি দিয়া হয়। নিজ সন্তানক এইদৰে ওভতাই পাই  আত্মহাৰা হৈ পৰে মাক।

ইতিমধ্যে ভাইৰেল হৈ পৰা এই ঘটনাৰ পাছত বিভিন্নজনে ৰে’লৰ চালক দিৱান সিং আৰু তেওঁৰ সহকাৰী অতুল আনন্দক পুৰষ্কৃত কৰাৰ বাবে আহ্বান জনাইছে।