জনৰোষৰ ভয়ত ৰাহুল গান্ধীক হাথৰাছৰ নিৰ্যাতিতা পৰিয়ালক সাক্ষাতৰ অনুমতি প্ৰদান যোগী আদিত্যনাথৰ

অৱশেষত ৰাহুল গান্ধীসহ পাঁচগৰাকীক উত্তৰ প্ৰদেশৰ হাথৰাছৰ নিৰ্যাতিতা পৰিয়ালক সাক্ষাতৰ অনুমতি দিবলৈ বাধ্য হ’ল ৰাজ্যখনৰ মুখ্যমন্ত্ৰী যোগী আদিত্যনাথে।

উল্লেখ্যে যে, ভগ্নী প্ৰিয়ংকা গান্ধীসহ ৩৫ গৰাকী কংগ্ৰেছী সাংসদৰ এটা বৃহৎ দল লৈ আজি ৰাহুল গান্ধীয়ে পুনৰ হাথৰাছৰ অভিমুখে ৰাওনা হয়।

কিন্তু দিল্লী আৰু উত্তৰ প্ৰদেশৰ সীমান্তৱৰ্তী নয়দাত ৰাহুল গান্ধীৰ বৃহৎ দলটোক পুনৰ আগভেটা দি ধৰে উত্তৰ প্ৰদেশৰ আৰক্ষীৰ এটা বৃহৎ বাহিনীয়ে।

উত্তৰ প্ৰদেশৰ আৰক্ষীৰ দলটোৱে ৰাহুল গান্ধীৰ দলটোক উত্তৰ প্ৰদেশত প্ৰৱেশ কৰাত আজিও বাধা প্ৰদান কৰে।

ইফালে ৰাহুল গান্ধীয়ে এটা বৃহৎ দল লৈ হাথৰাছলৈ ৰাওনা হোৱাৰ খবৰ পায় উত্তৰ প্ৰদেশৰ নয়দাত হাজাৰ হাজাৰ কংগ্ৰেছ কৰ্মী উপস্থিত হয়।

ৰাহুল গান্ধীক হাথৰাছৰ নিৰ্যাতিতা পৰিয়ালক সাক্ষাতৰ অনুমতি প্ৰদান নকৰিলে উত্তৰ প্ৰদেশ আৰু দিল্লীৰ সীমান্ত নয়দাৰ পৰিস্থিতি বিষম হোৱাৰ আশংকা কৰি উত্তৰ প্ৰদেশ চৰকাৰে ৰাহুল গান্ধী আৰু প্ৰিয়ংকা গান্ধীসহ ৫ জন লোকক হাথৰাছৰ নিৰ্যাতিতা পৰিয়ালটোক সাক্ষাতৰ অনুমতি প্ৰদান কৰিবলৈ বাধ্য হয়।

ইয়াৰ পিছতে উত্তৰ প্ৰদেশ আৰু দিল্লীৰ সীমান্তৱৰ্তী অঞ্চলটো শান্ত হয়।

উল্লেখ্য যে যোৱা বৃহস্পতিবাৰে ভগ্নী প্ৰিয়ংকা গান্ধীসহ ৰাহুল গান্ধীয়ে হাথৰাছৰ নিৰ্যাতিতা পৰিয়ালটোক সাক্ষাৎ কৰিবলৈ যাত্ৰা কৰিছিল যদিও সাক্ষাৎ কৰিবলৈ নিদি উত্তৰ প্ৰদেশ আৰক্ষীয়ে তেওঁলোকক আটক কৰিছিল।

আনকি উত্তৰ প্ৰদেশ আৰক্ষীয়ে ৰাহুল গান্ধীক দুৰ্ব্যৱহাৰ কৰাৰ ভিডিঅ’ ভাইৰেল হৈ পৰিছিল। ইয়াৰ পিছতে সমগ্ৰ দেশজুৰি তীব্ৰ সমালোচনাৰ সন্মুখীন হয় উত্তৰ প্ৰদেশৰ মুখ্যমন্ত্ৰী যোগী আদিত্যনাথ আৰু তেওঁৰ আৰক্ষী প্ৰশাসন।

ইফালে উত্তৰ প্ৰদেশ আৰক্ষীয়ে হাথৰাছৰ নিৰ্যাতিতা পৰিয়ালটোক গৃহবন্দী কৰাৰ লগতে সংবাদ মাধ্যমকো পৰিয়ালটোক সাক্ষাৎ কৰাৰ অনুমতি দিয়া নাছিল।

অৱশ্যে ৰাষ্ট্ৰীয় স্তৰত তীব্ৰ সমালোচনাৰ সন্মুখীন হোৱাৰ পিছত আজি উত্তৰ প্ৰদেশ চৰকাৰে সংবাদ মাধ্যমকো নিৰ্যাতিতা পৰিয়ালটোক সাক্ষাতৰ অনুমতি প্ৰদান কৰিবলৈ বাধ্য হয়।