দিল্লীৰ পৰা ছিডনীলৈ আৰম্ভ হ’ব এয়াৰ ইণ্ডিয়াৰ অতিৰিক্ত বিমানৰ উৰণ : কিন্তু কেতিয়াৰ পৰা ?

ভাৰতীয় বিমান পৰিবহণ সংস্থা এয়াৰ ইণ্ডিয়াই দিল্লীৰ আৰু অষ্ট্ৰেলিয়াৰ ছিডনীৰ মাজত অতিৰিক্ত বিমান সেৱা আৰম্ভ কৰিব।

বুধবাৰে নিশা সংস্থাটোৱে নিজা টুইটাৰ একাউন্টত এই কথা ঘোষণা কৰিছে।

“এয়াৰ ইণ্ডিয়াই অহা ১০ৰপৰা ১৪ অক্টোবৰলৈ দিল্লীৰ পৰা ছিডনীলৈ অতিৰিক্ত বিমান সেৱা আগবঢ়াব।” টুইটাৰ এইদৰে কয় সংস্থাটোৱে।

সংস্থাটোৱে লগতে আৰু কয় যে অষ্ট্ৰেলিয়াৰ চৰকাৰে বলৱৎ কৰা কোভিড-১৯ প্ৰটোকলৰ বাবে এনে বিমান উৰণত সীমিত সংখ্যক যাত্ৰীয়েহে যাত্ৰা কৰিব পাৰিব।

“অষ্ট্ৰেলিয়া চৰকাৰৰ কোৱাৰেন্টাইন সীমাৱদ্ধতা মানি আজি দিনৰ ১৬.০০ বজা(আন্তৰ্জাতিক সময়মান অনুসৰি)ৰপৰা এয়াৰ ইণ্ডিয়াৰ বেৱচাইট, বুকিং কাৰ্যায়ল আৰু কল চেন্টাৰৰ যোগেদি যাত্ৰীসকলে টিকট বুকিং কৰিব পাৰিব।” বিমান পৰিবহণ সংস্থাটোৱে লগতে কয়।

ইফালে ২০ জানুৱাৰীৰ পৰা দিল্লী-পেৰিচৰ মাজত এয়াৰ ইণ্ডিয়াই সপ্তাহত দুদিনকৈ বিমান উৰণ আৰম্ভ কৰিব। সপ্তাহৰ বৃহস্পতি আৰু দেওবাৰে দিল্লীৰ পৰা পেৰচিলৈ আৰু প্ৰতি সোম আৰু শুকুৰবাৰে পেৰিচৰ পৰা দিল্লীলৈ বিমান চলাচল কৰিব।

ইফালে এয়াৰ ইণ্ডিয়াই বিশ্বৰ কেবাখনো দেশৰ সৈতে সীমিত সংখ্যক বিমান উৰণৰ বাবে সিদ্ধান্ত গ্ৰহণ কৰিছে।

উল্লেখ্য যে ভাৰত চৰকাৰে মহামাৰী ক’ৰ’ণাৰ প্ৰতিৰোধৰ বাবে যোৱা ২৫ মাৰ্চৰ পৰা যাত্ৰীবাহী আন্তৰ্জাতিক বিমান উৰণ স্থগিত ৰাখিছিল।

অৱশ্যে যোৱা মে’ মাহত বিশ্বৰ কেবাখনো দেশত আৱদ্ধ ভাৰতীয় নাগৰিক আৰু শিক্ষাৰ্থীসকলক দেশলৈ ওভতাই আনিবলৈ ‘বন্দে ভাৰত অভিযান’ শীৰ্ষক এলানি বিমান সেৱা আৰম্ভ কৰিছিল।

ইফালে যোৱা ২৫ মে’ৰ পৰা ঘৰুৱা বিমানৰ উৰণ পুনৰ আৰম্ভ কৰা হৈছিল।